Esta selmana, la música asturiana va tener una bona representación en dos festivales intercélticos de fuera d’Asturies: el Festival Internacional do Mundo Celta de Ortigueira (Galicia) -dende güei xueves 11 hasta’l domingu 14- y l’Intercéltico de Orejo (Cantabria) que se celebra del 12 al 14. Nellos van participar un total de 9 formaciones.
Güei entama una nueva edición del Festival Internacional do Mundo Celta de Ortigueira. La representación asturiana d’esti añu va sonar colos conciertos nel escenariu principal de Picarós -que participen nel Concurso Runas– y José Manuel Tejedor; les actuaciones pela cai de la Banda Gaites Candás, la Banda Gaites Villaviciosa – El Gaitero y la Bandina de Cuaya -nueva formación integrada por Loreto Suárez, Luis Ángel Fernández Santos, Sátur Vega y Nel Villanueva-; y el taller de baille qu’imparte Xesús Nel Villanueva. Dellos conciertos van poder siguise equí.
Picarós ye’l primer grupu en xubir al escenariu de la Praza Isabel II güei a les 22.45h. La Banda Gaites de Candás, la Bandina de Cuaya y la Banda Gaites Villaviciosa toquen peles cais d’Ortigueira dende’l vienres pela mañana hasta’l sábadu pela tarde. Amás, dambes agrupaciones participen nel Desfile das Nacións Celtas el domingu a les 11.30h. José Manuel Tejedor ye la última formación asturiana que va sonar nesta edición, el domigu 14 depués de la medianueche.
Música’l país en Cantabria
Per otru llau, mañana vienres 12 arranca’l XXVII Intercéltico de Orejo, en Marina de Cuaya (Cantabria). La música asturiana va sonar nel conciertu del grupu de José Manuel Tejedor mañana a les 22h, na voz d’Anabel Santiago esti sábadu a les 18.30h, y nes gaites d’Hevia -sábadu a les 22h- y Bras Rodrigo, que zarra’l festival el domingu 14 a les 22h.
Suscríbite a les nuestres novedaes
