Chus Pedro y Manolo Peñayos, Nuberu, tornen con un conciertu na Nueche Celta d’El Puntal esti sábadu 13 de xunetu dempués de la so cabera aparición na Folixa de Mieres en 2017. El folk de Baxel y la música celta new-age de Guieldu completen la programación del eventu, qu’entama a les 20.45h nel Área Recreativa «El Palacio» y tien un preciu d’entrada de 15 € anticipada o 20 € na puerta. Organiza la Comisión de Fiestes «San Martín del Mar».
Nuberu ye ún de los nomes imprescindibles de la música asturiana dende la so formación en L’Entregu en 1976. La so música ye la banda sonora de la Transición nesti país, con unos composiciones que-y canten a les llibertaes, a les lluches obreres, a la nuestra historia y identidá o al mundu de la mina. Esti dúu forma parte del movimientu musical denomáu Nuevu Canciu Astur que puxó pola canción d’autor n’asturianu. Publicó seis álbumes d’estudiu, dellos compilatorios y dos directos; col últimu d’ellos, 30 Años, Yá Llovió, despidíense. Una collaboración nel conciertu pol 75 aniversariu de la Coral Polifónica Gijonesa «Anselmo Solar» nel pasáu mes d’abril foi’l detonante pa que Chus Pedro y Manolo Teñayos decidieren volver col so proyeutu.
Cantares como «Aida de la Fuente», «Asturies, tiempu de nosotros», «Atiendi, Asturies» o les sos versiones de «En el pozu María Luisa» y el «Chalaneru» resuenen na memoria del pueblu asturianu. Axallá sigan cantando a esti país, porque prometen quedase. La próxima actuación de Nuberu ye’l miércoles 31 de xunetu a les 20.30h nel Muséu del Pueblu d’Asturies, en Xixón, dientro del Arcu Atlánticu.
Suscríbite a les nuestres novedaes
