Agora que la música tradicional y poro’l folk tán viviendo un momentu d’oru, destacando sobre manera la presencia de xente mozo ente los sos consumidores y públicu, surden munches oportunidaes pa los profesionales d’esti xéneru.
Pa les que llevamos años nesta escena y tenemos menos de 30, yá sentimos delles vegaes el discursu de los más veteranos nel qu’animen a la mocedá a formar nuevos grupos de folk pa qu’esista esi relevu xeneracional que paecía tar mui lloñe. Por embargu, llegaron esos esperaos “suplentes” y, anque entá somos pocos, vinimos con ganes de deprender y un compromisu cola causa. Pero nun ye tou un camín de roses, nin munchu menos.
«Esto nun son namás sensaciones, val con mirar pa dalgún de los cartelos d’eventos de los caberos años: ¿Cuántes formaciones de xente mozo atopes?»
Eses promeses de facenos güecu quedaron, en varios casos, en namás qu’eso: promeses. Porque nes jam sessions pues sentate al llau de los grandes músicos pa qu’aprendas, pero hai que medir la proactividá porque molesta que toques muncho; porque cuando salga un bolu nel que 2/5 de los componentes nun puedan dir nun van pasa-y el bolu a los emerxentes y a la so nueva propuesta, sinón que van axuntase los 3/5 que sí podíen pa formar un tríu con otru nome y montar un repertoriu de temes desempolvaos o reutilizaos d’otres formaciones. Y ye qu’esto nun son namás sensaciones, val con mirar pa dalgún de los cartelos d’eventos de los caberos años: ¿Cuántes formaciones de xente mozo atopes?
Otra mención ye la de la -yá mui debatida- propuesta del Festival Intercélticu de Lorient na supuesta edición dedicada a la mocedá, que destaca pola ausencia d’esta. Fórmenla delegaciones enteres principalmente representaes poles formaciones más recurrentes, les cuales tienen amás oportunidaes abondo durante tol añu. Sicasí, cuelen un par de mozos pa intentar que nun se note lo obvio, supongo.
«Queremos ser escuchaos, compartir escenariu cola xente qu’almiramos y que tomamos como referencia a la hora de componer los nuestros temes o reinterpretalos. Nun queremos mover silles, queremos compartiles»
Nes conversaciones que compartimos ente los componentes d’esta “xeneración relevu” siempres hai opiniones comunes: nun queremos que naide nos regale nada namás que pola edá, pero ye mui desmotivador ver siempres les mismes cares, la carencia de referencies, ensin cuntar cola cuasi nula representación femenina… Hai escepciones, porque dalgunos tuvimos suerte y algamamos esi güecu, pero siguimos ensin tener suficiente pa tolos que yá somos y lo que tenemos qu’amosar. Queremos ser escuchaos, compartir escenariu cola xente qu’almiramos y que tomamos como referencia a la hora de componer los nuestros temes o reinterpretalos. Nun queremos mover silles, queremos compartiles.
Pero nun quiero quedame esclusivamente colo negativo, porque ye importante mentar que tamién hai casos nos que les pallabres sí se corresponden colos actos. Gracies a iniciatives como’l Semando Fest, el nuevu festival La X.O.T.A, Llar Trad Fest y dalgún chigre como El Cafetón, El Corquiéu, El Cuévano o La Taberna Narciso, que dende va unos años apuesten polos grupos más amateur, tenemos la oportunidá de ufiertar el nuesu trabayu en directu y tener les perres y la visibilidá necesaria pa siguir.
«Na música tradicional hai una meyor acoyida de los que lleguen, que fomenta esti boom que ye notablemente mayor que nel folk, entá bebiendo dambes coses d’un mesmu raigañu»
Si falamos de música tradicional la visión ye, polo xeneral, distinto. Hai una mayor collaboración porque lleguen nueves xeneraciones ensin malos hábitos o dinámiques tóxiques, y ensin la cultura de competición que veníemos viendo años atrás. Toos tienen güecu, da igual el nivel o’l conocimientu. Creo que la buena acoyida de los que lleguen, por mor de que siempres ye positivu qu’haya xente interesao na to pasión o profesión, ye lo que fomenta esti boom que ye notablemente mayor que nel folk, entá bebiendo dambes coses d’un mesmu raigañu: la tradición oral d’Asturies.
La conclusión ye que la collaboración y la divulgación del conocimientu son siempres el camín a tomar pa avanzar y que la nuestra cultura nun se pierda nel baúl de los recuerdos d’unos pocos.
Suscríbite a les nuestres novedaes
