Febreru arranca con once cites confirmaes cola música n’asturianu

Esti domingu entamen los eventos de febreru, mes nel que pel momentu hai confirmaes once cites cola música n’asturianu. Ente elles hai variedá d’estilos y de formatos: habiendo festivales, conciertos, presentaciones de discos y una nueche en danza. Les actividaes tán concentraes sobre manera nel centru’l país y hailes de baldre, en sales de conciertos, bares y auditorios.

Esti domingu 4 entama la programación col conciertu de Nieru, tríu de folk atlánticu de reciente creación que s’estrena en directo con esta actuación na Taberna Narciso de Terbega, a les 13h. Esi mesmu día en Lluanco la Bandina La Garrapiella van actuar peles cais de la capital gozoniega. Les dos actividaes son de baldre. Amás, la Taberna Narciso de Teberga tamién programa más eventos folk pal vermú de los domingos: el 11 de toquen Buxane -tríu astur-l.lacianiegu formáu por Dani Álvarez, Marcos Mendo y Sabu– y el 18 Trelde.

El fin de selmana qu’entra el calendariu ta enllenu gracies al II Semando Fest, festival de música moza n’asturianu nel que van tocar Sandra Álvarez y Noemí González col so espectáculu de tonada & poesía feminista, Mostru l’Horru col so rap combativu, el grupu de folk celta Guieldu y la banda punk Ochobre. La cita ye’l vienres 9 na sala Lata de Zinc d’Uviéu. Al día siguiente otra fecha mui esperada: la presentación en directo de V.O.S el tercer discu de L-R. El dúu de post-folk escoyó la Sala Acapulco de Xixón como espaciu pa esta celebración y xunto a ellos va tar Ferla Megía como teloneru. Tamién actúen el vienres 9 nel Valey de Castrillón la Orquesta Céltica Asturiana, formación que’l 22 de febreru tamién va tar nel Auditoriu José Barrera de Pravia; dambes cites dientro del circuitu públicu Asturies Cultura en Rede.

Antroxu y punk

Nesti mes nun pueden faltar los eventos rellacionaos col antroxu. D’esta manera, la Xiranda Brass Band actúa na Plaza La Baragaña de Candás el llunes 12 a les 19h pa cellebrar esta fiesta asturiana y L’Infiestu acueye’l 17 de febreru l’Antroxu en Danza. Depués de tres ediciones consecutives, La Benéfica, Les Ablanes y LaKadarma vuelven a entamar esta xuntanza con baille, música del país y mazcaritos. Pa poner el ramu al mes, la banda punk-fok Skontra toca na sala Tizón de Xixón el 24 de febreru nel I+X Aniversariu d’Ixuxú Cultura.

Dexa un comentariu

X