Yá ta na cai l’Anuariu de la Música Asturiana 2023

Esta selmana entama a distribuyise y asoleya online la edición 2023 del Anuariu de la Música Asturiana, publicación editada por Goxe Producciones que lleva venticinco años faciendo un repasu fondu a lo que dio de sí’l recién pasáu añu en rellación a la música d’espresión asturiana. Como de costume les temátiques céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, recoyida de material o anuncies. L’Anuariu ye de baldre, inclúi un CD compilatoriu y pue consiguise en dellos llocales repartíos pel país .

L’Editorial, nesta ocasión, titúlase «Responsabilidá pública» y nél fálase del papel que l’alministración autonómica debiera xugar na promoción y apoyu a la escena musical propia, n’especial per parte de los medios de comunicación de titularidá pública; nesti sen, manifiéstase: «La historia y la importancia de la música asturiana fai que cuente con una entidá suficiente como pa tener un tratamientu específicu nel ente de comunicación públicu asturianu, de manera especial na radio, mediu particularmente amañosu pal so espardimientu. Nesti contestu, ye más que necesariu un programa concretu nel que tratar tolo relativo a la mesma, dándo-y un enfoque global, conociendo la so historia, novedaes, noticies, publicaciones, actuaciones… Un espaciu que promueva l’interés por ella y que cree un públicu estable, que consuma los sos productos y vaya a disfrutar del directo de los y les sos artistes».

En cuantes a los conteníos, destaquen la crónica titulada «De Glasgow a Villaviciosa pasando per Ortigueira» (resume de l’actividá folk a lo llargo del 2023); l’informe «Del cine mudu al españíu del 2023: una historia del videoclip n’asturianu» (sobre l’audiovisual musical del país dende principios del sieglu XX hasta anguaño); los reportaxes «Prohibío cantar n’asturianu nestes fiestes» (alredor de la polémica xenerada poles declaraciones de dellos conceyales de Xixón tocante a vetar a los y les artistes qu’empleguen la llingua asturiana) y «Somos mundiales» (repasu a cómo se foi produciendo históricamente la internacionalización de la música del país); l’artículu dedicáu a facer alcordanza de Xulio Ramos; o les entrevistes a La Bonturné, Alienda, Mapi Quintana y Rodrigo Cuevas. L’Anuariu zárrase, como siempre, cola sección «Collecha», onde apaecen les producciones musicales y bibliográfiques del 2023. 

El volume compleméntase con un discu nel que se recueyen muestres de lo meyor qu’ufiertó l’añu, con diecisiete cortes d’estilos como’l folk, el rock, el pop o la canción d’autor, con artistes y grupos como Antón Menchaca, 6 Riales, Calea, Mapi Quintana, Haim Álvarez, Bango, Ana Lamela o Diañu Blues. Esta compliación pue sentise tamién per YouTube, dientro de la canal oficial de musicasturiana.com.

Puntos de distribución

AVILÉS: Cervecería Cabanón, El Cafetón CANDÁS: La Rexa L’ENTREGU: El Fielato Casa Carmina LLANGRÉU: L’Artesana, Matteria Creativa MIERES: La Llocura, Rodapié NAVA: La Naveta NOREÑA: Copistería La Semeya SIERO: Taberna Cuévano, Abrelatas UVIÉU: L’Esperteyu, La Raposa, Llibrería Trabe, Puru Remangu VALDÉS: Camping Playa de Taurán VILLAVICIOSA: Escuela de Música Tradicional Banda de Gaites Villaviciosa “El Gaitero” XIXÓN: Café Trisquel, La Vida Alegre, La Revoltosa, Paradiso, UC Ceares

Sentir el discu del Anuariu de la Música Asturiana 2023

Dexa un comentariu

X