El pasáu payares Vero Rubio algamó’l XV Premiu Camaretá al Meyor Cantar con «Dixo miou padre«. Gracies a esto la multiinstrumentista ta participando nel circuitu Autores nel Camín qu’entama la Dirección Xeneral de Política Llingüística pa «acortar esa distancia ente la ciudadanía y los autores ganadores de los premios lliterarios y artísticos entamaos pol Gobiernu del Principáu d’Asturies». Tres entamar la xira Vou n’abril y tocar nel primer conciertu d’esti circuitu el pasáu vienres en Valdés, Rubio tien otres seis feches a lo llargo de mayu y xunu que la van llevar a percorrer el país.
La sala Loreto de Colunga (10 de mayu); el Teatru Vital Aza de L.lena (12 de mayu); el Centru Cultural Clarín de Villaviciosa (18 de mayu); el Teatru Toreno de Cangas del Narcea (24 de mayu); la Factoría Cultural d’Avilés (7 de xunu); y el Teatru Prendes de Candás (22 de xunu); son los próximos conciertos que tien esta artista canguesa. Nellos van entemecese actuaciones en formatu reducíu y otros cola banda al completu, formada por Miguel García (violín), Mónica Jivanescu (viola), Paula Menéndez (violoncello), Puri Penin (voz y armonio), Mary K. Mass (voz) y la propia Rubio al piano, voz trompa y trompeta, Tamién va haber una charra cola artista dientro de les feches enmarcaes n’Autores nel Camín.
Vero Rubio ye una multiinstrumentista que toca’l pianu, la trompeta, la trompa y el bodhram. La so carrera desenvuélvese ente’l mundu de la música clásica, onde tuvo la oportunidá de tocar con orquestes como la Orquesta Sinfónica de Barcelona y Nacional de Catalunya (O.B.C.), y el del jazz. Anguaño, toca en dellos grupos de distintos estilos (folk, rock, improvisación llibre, jazz…): Orquesta Céltica Asturiana, Sonámbulos, Improviso… Amás compaxina esti llabor como instrumentista cola composición y producción de la so música de manera independiente. Tien tres cantares en solitario publicaos en plataformes musicales: «Vou caminando», «Vou cantar» y «Dixo miou padre».
Suscríbite a les nuestres novedaes
