El Muséu del Pueblu d’Asturies ta acabante d’anunciar la donación del Archivu de Música Tradicional de Fernando Ornosa a los sos fondos. Trátase d’una colección de milenta audios pertenecientes a la tradición musical y oral qu’esti investigador lleva compilando dende 2001. Agora mesmo pueden consultase los más de 150 qu’estrenen la estaya de Fondos Sonoros de los archivos dixitales del Ayuntamientu de Xixón -que yá tien fondos fotográficos, museográficos, gráficos, documentales, hemerográficos…- y nos que, amás de sentilos, pue lleese información detallada como l’añu, procedencia xeográfica, colección d’orixe y otros datos de contestu.
Cantares, bailles, pieces instrumentales, cuentos, lleendes, romances, toponimia, testimonios orales, memories de vida y tolo que tien que ver cola música popular y tradicional d’Asturies va tar disponible nesti archivu públicu que, amás de la colección donada por Ornosa, contién les cesiones feches por parte d’otros 93 investigadores y asociaciones culturales venceyaes a la recoyida d’estos testimonios. L’archivu d’Alan Lomax, de Xuacu Amieva, de Yolanda Cerra, del Centro Etnográfico Joaquín Díaz, amás de grabaciones d’actuaciones de grupos de música y folclore, conferencies, etc. son dalgunos de los estremaos archivos que dan forma a esti más grande coordináu por Fernando Ornosa y que, como él mesmo sorraya, «contién grabaciones que tienen el marcu llegal afayadizu y van dende l’añu 1931 hasta la selmana pasada».
Los Fondos Sonoros agora mesmo dixitalizaos son 153 pieces representatives de la música y la tradición oral asturianas recoyíes ente 1979 y 2023 y pertenecientes a los conceyos de Castropol, Degaña, Santalla de Ozcos, Cuideiru, Quirós y Llanes. Ente ellos hai grabaciones rexistraes a informantes como Matilde Amieva (El Mazucu, Llanes), Dolores Fernández (El Rebol.lal, Degaña), Arcides y María González (Trabáu, Degaña), Matilde Díez (As Figueiras, Castropol), o Antonio Villar (Ancadeira, Santalla de Ozcos). Según el coordinador del proyectu, «ye una esbilla que busca materiales de distintos llugares, de persones qu’a lo meyor nun son tán desconocíes por dalguna xente y que contrasten grabaciones vieyes con otres d’estos momentos».
Procesu participativu y constante
«Había unos fondos que se trabayaren hasta l’añu 2012 y dempués hubo un paréntesis, pero foi creciendo’l proyectu: ficiéronse más grabaciones, firmáronse más contratos y lo que fici nesti momentu pa poder normalización la rellación col Múseu del Pueblu d’Asturies y que se pudiera facer público foi una donación de tolos fondos», desplica Fernando Ornosa sobre esti procesu que ta «nuna primer fase de facer públicos los fondos sonoros porque esos audios hai qu’editalos: pero la selmana que vien yá van salir más, la siguiente más y asina sucesivamente».
Amás, l’investigador sorraya’l calter «participativu y collaborativu» del proyectu: «Dirán incorporándose persones pa editar fondos y pa meyoralos a traviés de beques y d’ayudes d’investigación, de collaboraciones col Taller de Músicos de Xixón, con toles persones que cedieron los fondos… Ye un proyectu abiertu que quier dir a la gueta de la collaboración con tol mundu, asina que ta abiertu a recibir cualesquier datu pa completalu, pa correxir errores, pal alderique, pa lo que seya». Con esta perbona anuncia, avánzase nel rexistru, catalogación y puesta a disposición pública del patrimoniu inmaterial asturianu.
Suscríbite a les nuestres novedaes
