Fernando Valle Roso y Silvia Moreno y Llevólu’l Sumiciu toquen n’Amosando

Amosando, el ciclu de presentaciones de discos entamáu por musicasturiana.com, continúa la edición del 2021 col conciertu/grabación de Fernando Valle Roso y Silvia Moreno y Llevólu’l Sumiciu nel que van presentar los sos trabayos recién salíos del fornu, Música pa la reciella y electrónica de raigañu pa da-y forma al octavu conciertu d’Amosando. Si quies ganar una entrada pa venir al conciertu –domingu 3 d’ochobre a les 17.30h nel Toma3 de Xixón-, pues participar nesti enllaz: http://eepurl.com/gC0FHX

Cantares de… y pa neñ@s” ye’l proyectu musical conxuntu de Fernando Valle Roso y Silvia Moreno. Con él, reivindiquen les canciones tradicionales que per munchos años la reciella asturiana cantaba pa divertise y que nos últimos tiempos foron escaecíendose. Pa qu’estos sones espoxiguen dan esti conciertu didácticu y grabaron un discu homónimu nel que compilen y reinterpreten diez d’estes pieces populares.

Llevólu’l Sumiciu ye un proyectu musical y audiovisual que nació en 2020 p’amestar música asturiana y electrónica. ‘Entaína‘ ye’l so primer EP, un trabayu nel que la música del país renuévase y cantares de formaciones como Nuberu, D’Urria, Xaréu Folk o Grupu Trasgu suenen más actuales y mestizos gracies a la revisión que faen d’ellos fusionándolos con ritmos afrollatinos y electrónicos.

Dexa un comentariu

X