Homenaxe al gaiteru Valentín Fuente esti sábadu en Siero
Esti sábadu, 25 de setiembre a les 12:00 hores, nel Teatru Auditoriu de La Pola (Siero), el gaiteru Valentín Fuente Álvarez va recibir un homenaxe entamáu pola Asociación del Folklore Amigos de la Tradición (AFATRA) y Amigos del Roble.
Esti maestru gaiteru escomenzó de bien rapaz a deprender a tocar l’instrumentu de la mano de Maximino García (El Gaiteru Carrocera). Interésase depués pol repertoriu de los gaiteros más tradicionales y entra a formar parte de dellos grupos folclóricos. Amás, ye’l gaiteru oficial de bien de concuros de canción asturiana, organiza festivales y ta presente en munches romeríes, fiestes y demás eventos. Siempre foi un gran defensor de la parexa de gaita y tambor como l’ementu central de la música del país, impartiendo clases y talleres de formación, publicando tamién un bon númberu d’artículos sobre’l tema. Tien grabaes bien de collaboraciones con intérpretes y agrupaciones folclóriques; en solitario rexistró un discu tituláu Raíces nueses, que ye una mui bona muestra de la gaita tradicional asturiana.
Amás d’instrumentista renomáu, ye collaborador del certame de Cancios de Chigre de La Pola, director del Concursu de Canción Asturiana Conceyu de Siero, impulsor de les alboraes nos Güevos Pintos y El Carmín, promotor del Concursu de Baille a lo Suelto o recuperador de los pasucáis con xigantes y cabezudos, ente otres munches actividaes.
Depués de cuarenta y cinco años d’actividá ininterrumpida, Valentín Fuente, va recibir esti homenaxe como agradecimientu al so llabor de conservación y espardimientu de la música y la cultura asturianes.
