La Taberna Narciso de Teberga sigue cola so actividá de programación d’eventos nos que la música’l país tien protagonismu abondo. Esti fin de selmana acueye los conciertos d’Arcea (vienres 12 a les 20h) y de Carlos Velasco & Chino «El Indio» (domingu 14 a les 13h). Amás, va poder vese la esposición Al Son de l’artista paesica, que ta dedicada a muyeres clave de la música tradicional asturiana.
Xabaz ye’l primer discu d’Arcea, proyectu musical del multiinstrumentista Gabriel Salguero Llaneza (bozouki, bodhran, curdión, campanes y vigulín) nel qu’andecha Claudia González Rodríguez al pandeiru y pandereta. El so responsable preséntalo asina en redes sociales: «un total de 10 temes que describen un viaxe pela viesca, les sensaciones qu’asoleyen al adientrase nella y les vides qu’escuende». L’´álbum pue sentise yá en bandcamp.
D’otra banda, el cantador de tonada Carlos Velasco -campeón del I Premiu «La Busdonga» d’Asturianada na categoría masculina- y el guitarrista Chino «El Indio» -cabezaleru de Mota Blues- comparten esti dúu nel que revisiten clásicos de la canción asturiana con un enfoque musical nuevu.
L’actividá complétase con Al Son. Tributu a la muyer rural, guardiana silenciosa de la tradición oral y musical; esposición que s’inauguró’l pasáu 1 d’avientu y que va poder vese na taberna tebergana hasta’l 31 d’esti mes. Nella, l’artista paesica xunta 12 ilustraciones que visibilicen el papel de les muyeres na tresmisión de melodíes, saberes y memoria colectiva. Les protagonistes apaecen tocando instrumentos tradicionales -dalgunos históricamente venceyaos a los homes- dende la intimidá de los pueblos y aldees, reivindicando’l so llugar nel corazón del folclore. Nomes como Rogelia Gayo, Justina Castañón, Concha ya Yrene de Tresmonte o Mariluz Cristóbal Caunedo, tán representaes no que l’artista define como un «retratu poéticu de la resistencia cultural femenina«.
Suscríbite a les nuestres novedaes
