Esti domingu a les 21.45h TPA emite un capítulu nuevu de Xuntanza. Nesta ocasión va tar conducíu pol mayestru y presentador de dalgunos concursos de canción asturiana Miguel Ánxel Montenegro y va tar dedicáu a l’asturianada y el so futuru; un xéneru vivu que dende la renovación de la tradición incorpora voces nueves y otres formes d’interpretala.
Les actuaciones son les Lucía Rojo col DJ Fruela 757 (tocando una de les pieces compuestes pa la 1er Muestra d’Asturianada Electrónica); Alicia Villanueva acompañada pol multiinstrumentista Luis Álvarez Pola pa interpretar ‘Carretera d’Asturies’ -tema incluyíu nel compilatoriu Semando Son editáu por Musicasturiana.com-; el dúu Milfueyes, formáu por Sandra Álvarez y Noemí González; María Latores; Carlos Velasco y Xuntances del Cuévanu, grupu nel que participen destacaos nomes de la música asturiana como’l mentáu Carlos Velasco, el gaiteru Xuacu Amieva; el guitarrista Chino «El Indio», el percusionista Simón San José; el bouzukista Julio Rodríguez; el flautista Dani Álvarez o la corista Alba Cuadra.
Amás de la música, va haber delles conversaciones con dalgunos de los artistes; col periodista Chus Neira y con Xicu Ariza, responsable de musicasturiana.com; que van falar ente otres coses de la 1er Muestra d’Asturianada Electrónica qu’acoyó hai unos díes el festival Artístiques y d’otres cuestiones rellacionaes cola canción asturiana.
Suscríbite a les nuestres novedaes
