El grupu asturianu de música celta new-age asoleya «Flor d’Artu«, el so nuevu single, adelantu del LP que ta grabando. El preestrenu n’esclusiva d’esti tercer cenciellu, que va tar disponible nes demás plataformes un día dempués, ye’l martes 30 de xineru a les 21h na canal de YouTube de Musicasturiana.com. Guieldu pon a disposición, amás, un enllaz col presave del single en Spotify, Apple Music, Deezer, Amazon music, Soundcloud o Tidal. Como nos dos anteriores, esti trabayu inclúi dos temes -remembrando los singles de 45 rpm- «Flor d’artu», que-y da títulu, y «Angueira». Pa la ocasión cuntaron cola destacada collaboración del músicu Pepín de Muñalén, ún de les figures más apreciaes de la escena folk asturiana, qu’apurre les llínees de saxu.
Dende les primeres notes del tecláu sintetizador y la guitarra acústica, «Flor d’artu» remembra los soníos que caracterizaron al llexendariu sellu discográficu «Windham Hill» y grupos como los irlandeses Nightnoise que supieron amestar la música tradicional y progresiva, acústica y eléctrica. El tema evoluciona dende la melodía d’una popular tonada asturiana, «Coyí d’un artu una flor», pa dir escontra un paisaxe musical de nueva composición con influxos de smooth jazz, funk y blues que l’asitien na esfera de la «celtic fusion», daqué distinto al tratamientu que suel facese a la música asturiana de raigañu.
«Angueira» podría ser el «Puirt à Beul» de la Raya Carboneira, magar, curiosamente, la lletra foi recoyida na rexón portuguesa de Tras-Os-Montes onde pervive’l Mirandés y otres llingües de raigañu asturlleonés. El tema constrúyese sobro un groove complexu creáu a partir de la rítmica del bouzouki irlandés, el slap del baxu eléctricu, los teclaos y la batería, dando-y un distintivu color funk al soníu, mui al estilu pop rock de los últimos años 80 y primeros 90, que s’acentúa especialmente cuando llega’l solu de saxu.
Próximes actuaciones de Guieldu
APÚNTATE AL ESTRENU EN YOUTUBE
SIENTI A GUIELDU EN SPOTIFY
Suscríbite a les nuestres novedaes
