L’Alcuentru Trad-Urbán, la xuntanza cola música y baille de tresmisión oral d’Asturies y Galicia d’anguaño como protagonistes, torna el sábadu 23 de marzu. Nesta ocasión, la llocalización escoyía ye la ciudá de Lugo, en Galicia. Como novedá, súmase a la organización la A.C. A Volta do Agro, de Lugo, que trabaya yá na programación xunto a Eva Outeiro (Galicia) y, pola parte asturiana, Les Pites y Santi Galguera.
Los detalles d’esta edición de 2024 van conocese próximamente, anque la organización avanza la mesma dinámica: talleres, mesa redonda, conciertos y folixa. En 2023, Yoni Martínez y Aida Mariño Ardura encargáronse de la formación de pandereta y baille asturianos, mientres qu’Eva Outeiro y Xandre Outeiro ficieron lo mesmo colos talleres de tradición gallega. El baille tradicional tuvo un llugar especial nel alcuentru, siendo’l tema central del alderique, moderáu por Mariuka -Les Pites-, cola participación de Llorián García Flórez, Gabi Reboredo y Branca Albán.
Los conciertos remataron la xornada del 25 de marzu de 2023: Abéu, Maghúa, Toma de Terra y la folixa de DJ Fañagüeta. Esta nueva edición, el 23 de marzu de 2024, promete siguir amosando la rellación ente les dos cultures, repitiendo formatu y treslladando la sede a Galicia.
Suscríbite a les nuestres novedaes
