Hevia estrena esti xueves 22 d’ochobre‘l videoclip de ‘Danza de Santa Ana‘, el so nuevu single y primer adelantu de Basado en hechos reales / Basáu en fechos reales, el proyectu col que prepara la so nueva xira pa los años 2027 y 2028. La pieza audiovisual va tar disponible nes principales plataformes.
El videoclip grabóse íntegramente en Llanes y cuenta cola collaboración de la Cofradía de Pescadores de Santa Ana, reconocida recién col Premiu Pueblu Exemplar d’Asturies que concede la Fundación Princesa d’Asturies. La grabación incorpora imáxenes de la celebración del día de Santa Ana y contó col sofitu del Conceyu de Llanes.
El nuevu espectáculu propón un viaxe al traviés de la música de raigañu y de la memoria de la tradición asturiana. José Ángel Hevia y María José Hevia recuperen la herencia musical que recibieron de los vieyos maestros nos años setenta, nun momentu de transición ente la tradición y l’actualización del folclor. La propuesta combina la música interpretada colos instrumentos orixinales y el soníu directu con histories, anécdotes y vivencies venceyaes a la transmisión d’esta herencia cultural.
Basáu en fechos reales plantega asina una puesta n’escena na que la música, la narración y los elementos visuales s’entemecen pa tresmitir les histories humanes que los acompañaron. El proyectu parte de la esperiencia de los dos hermanos como esllabones d’esa cadena de tresmisión, nuna mirada a la tradición que busca averase a ella ensin recreaciones nin artificios.
Suscríbite a les nuestres novedaes
