Hevia nun apara. Tres de la so vuelta a los escenarios asturianos per tolo alto na Semanona de Xixón y llanzar el discu Platinum Europe Award. 25 Aniversario, el gaiteru asturianu actual más internacional da nueves anuncies. El pasáu vienres 17 de xineru estrenó Basáu en fechos reales na so canal de YouTube, una serie audiovisual na que va dir falando de «música tradicional, historia y histories». Amás, va actuar el 22 de marzu nel Teatru Campoamor d’Uviéu con dellos artistes convidaos.
«Basáu en fechos reales ye una declaración d’intenciones. Va décades los vieyos compartíen con nós nes sos cocines rurales les sos histories, la so tresmisión oral. Como eso yá nun pasa vamos da-y a esa tresmisón oral una oportunidá nes redes sociales«, desplica’l gaiteru maliayu sobre esti proyectu nuevu. Nos distintos videos va «falase de música, facese música ente amigos y va compartise, poniendo a disposición de tol que quiera partitures, grabaciones y sobre manera histories que se tresmitieron de xeneración en xeneración».
El primer episodiu ta dedicáu a Los Carbayones, una agrupación de seis componentes «qu’amenizaben les romeríes cola so música». Según desplica’l músicu nel videu toquen «al estilu de les vieyes agrupaciones de gaiteros» y na pieza collaboren xunto a José Ángel y María José Hevia Fonsu Les Regueres, Pepín de Muñalén y Iván Fernández. A lo llargo de diez minutos Hevia va cuntando la historia d’esta formación entemeciéndola con imáxenes d’archivu y, amás, pon a disposición la partitura de la ‘Xota Casina’ pa quien-y la pida escribiendo a busindre@hevia.es.
Conciertu nel Campoamor
Amás d’esti programa de YouTube, el pernomáu gaiteru tamién anunció apocayá novedaes del so próximu conciertu nel Teatru Campoamor. El 22 de marzu a les 20h van actuar xunto a Hevia Marisa Valle Roso, l’artista cubana Liuba María Hevia y les bandes de gaites Ciudad de Oviedo y Candás. Les entraes yá tán a la venta dende 30 euros na web del músicu maliayu.
Suscríbite a les nuestres novedaes
