Identidá occitana a ritmu raggamuffin

Mayu del 68 foi, al final, una revolución más mental que práctica: fixo reflexonar a los sectores más inquietos del Estáu francés, y d’otros, sobre un bon fargatáu de temes y cuestiones. Ente ellos, el problema de los pueblos postergaos y ensin nengún poder de decisión, condergaos al colonialismu internu y al olvidu. Aquellos socedíos facilitaron la toma de conciencia sobre’l problema, primero cultural y depués políticu, del pueblu bretón, corsu, vascu, catalán, alsacianu… y tamién occitanu.

Esta vieya nación d’Europa formada poles rexones de Lemosin, Auvernha, Delfinat, Guiana, Gasconha, Provença, Lengadòc, el Val d’Aran (nel Estáu español) y les Valadas (nel Estáu italianu), tien una historia rica y fonda, ente ello, acontecimientos tan conocíos como la resistencia heróica de los cátaros en Carcassonne. L’idioma propiu tuvo bien d’importancia na Edá Media, colos trovadores, pero actualmente ta nuna situación realmente abegosa onde la fragmentación y la dialectalización estrema amenacen el so futuru. Ello nun foi estorbu pa qu’en 1904 Frédéric Mistral algamara’l Premiu Nobel de Lliteratura pola so obra escrita en provenzal.

«Esta vieya nación d’Europa ta formada poles rexones de Lemosin, Auvernha, Delfinat, Guiana, Gasconha, Provença, Lengadòc, el Val d’Aran (nel Estáu español) y les Valadas (nel Estáu italianu)»

Occitania redescubrióse a sí mesma naquellos finales de los sesenta y, como n’otres comunidaes nacionales pequeñes, surden movimientos de recuperación y dignificación de los elementos fundamentales de la so identidá: llingua, cultura, folclor, música… Naz entós la Nueva Canción Occitana con nomes como Rosina de Peira, Patric, Daumas, Beltrane, Mans de Breish o, el más importante de toos, Marti. Esti últimu resume en palabres propies lo que significó aquello: «Yera entós natural qu’a partir de ciertu grau de desarrollu de la idea occitana apaeciera nesta tierra xente que recuperara tolo guapo, digno y representativo de lo que fixeren los nuestros antepasaos. Vencida la vergüenza llegara’l momentu d’escomenzar a recuperar tolo nuestro… Eso participaba d’un movimientu xeneral de conquista d’una identidá total…». Más claro, imposible. La Nueva Canción punxo les bases pal resurdir del folk nos ochenta, onde grupos como Mont-Joia, Lambrusc, Cardabela, Gentiane o Perlinpinpin Folc garraron la palabra: «Ende qu’un jorn e posquim vivers drets, adara que vam cantar. Ende qu’un jorn e posquim viver liures, adara que vam dançar» («Pa qu’un día podamos vivir de pies, agora vamos cantar. Pa qu’un día podamos vivir llibres, agora vamos baillar»), canción del grupu Ferrine Folc). El testigu gárrenlu nos noventa bandes que renueven el soníu folk como Lo Jai, La Talvera o Loriandre, qu’abren les melodíes tradicionales a espresiones nueves.

Rosina de Pereira, autora de la Nueva Canción Occitana
Ente otros, Ferrine Folc protagonizaron el resudir folk

Pero al empar d’ello desendolcóse tamién otru movimientu musical: aquel que, sobre una base de músiques actuales y bien distintes (rock, reggae, raggamuffin, rap, electrónica…), escueye l’idioma llariegu pa la so espresión. Apaecen asina formaciones como Fabulous Trobadors, Dupain, Compagnie Lubat o, la más conocida y importante, Massilia Sound System. Ente estes cuatro, y delles más, conformen la llamada linha imaginot, que xune les ciudaes onde s’alcuentren los artistes actuales que desendolquen el so llabor sobre la pista de la cultura occitana: Marsella, Toulouse y Uzeste.

Massilia (Marsella en llatín) Sound System tien el debú en 1984, formada por dos cantantes y un Dj que revolucionen la música occitana al xuntar raggamuffin col soníu y l’idioma de la tierra. Recoyendo y actualizando la tradición de los trovadores, faen la crónica de la so ciudá, emplegando’l provenzal en lletres que falen de fútbol, fiestes de tou xéneru y de la vida nel barriu; bien llueu empiecen a ser conocíos como troubamuffins. En 1989 monten la so propia infraestructura musical, Roker Pròmòcion, y proponen a otros artistes orixinarios de la rexón exercer el so talentu ensin tar obligaos a dir a París. Asoleyen delles casetes y en 1991 sal a la cai’l so primer trabayu discográficu, tituláu espresivamente Parla patois (esti términu de patois emplégase, con ciertu calter despectivu, pa llamar a les fales populares consideraes dialectos del francés). El resultáu ye elegante y enllenu d’humor -nún de los cantares presenten el PIM (Partíu Independentista Internacionalista Marsellés), invención delirante de la banda-, con esti discu algamen una mayor repercusión y danse a conocer per toa Occitania. Depués d’él vendríen otros como Chourmo, Commando Fada o Aïoollywood, onde, dende’l primixeniu raggamuffin, van aportando a un soníu más ellaboráu y complexu con infinidá de matices y influyencies. Convertíos en símbolu de la mocedá occitana más comprometío, en 1998, abandonen el so pueblu, Vitrolle (al llau de Marsella), por mor de la incompatibilidá col nuevu alcalde d’estrema derecha. D’ente los sos trabayos merez la pena destacar los titulaos 3968 CR13 (matrícula d’un dos caballos vieyu que representa la resistencia) y Occitanista (toa una declaración de principios); nellos la música tradicional ocupa un sitiu cimeru, pero acompañada con sones reggae, rap, rock y multitú de samples que producen un efectu sonoru bien orixinal y atrayente.

Òai E Libertar ye ún de los álbumes más reconocíos de Massilia Sound System

Esti movimientu musical ta intentando que la vieya llingua d’Occitania llegue a les xeneraciones más nueves, posibilitando que la cadena de tresmisión nun franza dende los trovadores hasta los nuestros díes.

XUNE ELIPE. Artículu publicáu orixinalmente en Rockmería. Revisáu y ampliáu pa musicasturiana.com

Dexa un comentariu

X