«Volveremos, eso de xuru, somos muyeres, esto nun va acabar con nós»

Marta Elola ye la voz de referencia del oriente d’Asturies, pero tamién ye la directora musical de Muyeres, un colectivu ensin el que yá nun se puede entender la escena sonora asturiana del sieglu XXI. El grupu publicó a primeros del 2020 el discu y espectáculu Humanes. Con cerca de trenta persones enriba del escenariu, la estrena del espectáculu’l 11 de xineru nel Teatru de La Llaboral de Xixón foi tou un éxitu de crítica y de públicu. Sicasí, la crisis sanitaria xenerada pol andanciu de coronavirus y la cancelación de toles actividaes culturales marcaron el pasu pelos escenarios d’un proyectu llamáu a marcar un enantes y un depués na historia de la música asturiana.

Muyeres ensin mieu y imperfectes pero que na so maraviyosa y imperfecta esencia tamién son humanes. Esta ye la presentación del vuestru proyectu nuevu…

Los temes y tol proyectu parten de trece histories que reflexen la vida y pasiones de trece muyeres imperfectes dafechu, como lo somos toes, humanes dafechu, como lo somos toes, y heroínes del tou y de la nada, como la mayor parte de la xente. Les sos duldes, les sos virtúes, les sos pasiones y los sos fracasos son lo que les fai especiales y ye equí xustamente onde s’alluga’l nuestru discursu. 

¿Qué diferencies hai en comparanza con Inda suenen, País Malva, o’l 20 Aniversariu?

La diferencia más radical ye que dende la so fundación Muyeres siempre interpretare temes tradicionales, mentanto que n’Humanes tolos temes son compuestos. 

¿Cómo encaresteis el fechu de pasar de la tradición a la ellaboración de temes propios?

De mano con dalgo de mieu y inseguridá por ser dalgo tan distinto a lo que nosotres llevábemos faciendo dende hai tantos años y tamién porque creyíamos que tábemos mui finxaes nello y que’l públicu igual nun diba entender el cambiu. Sicasí, y a pesar d’esi mieu, mui ilusionaes. Yera un cambiu que facía falta, yá triáremos tolos caminos no tradicional y nun nos víemos mui animaes pa siguir per esa sienda. El dilema yera iguar temes tradicionales, poner lletres de composición propia sobre música tradicional o crear música y lletra dende la nada, pero calteniendo los ritmos y formes propies de lo tradicional, les percusiones y la forma de dicir y tresmitir. Y asina lo fiximos.

«Ensin l’ayuda de tolos que nos patrocinaron nunca lo tendríemos llograo»

¿Cómo foi’l trabayu de construyir eses 13 histories de muyeres siguiendo los esquemes de cantares tradicionales?

Lo primero foi montar un equipu que buscare histories de muyeres onde pudiera ponese lletra y música. Alcontremos delles histories y escoyimos les que más nos dicíen. Depués vieno escribiles en forma de biografía y lleeles adulces y con procuru pa ver qué música encaxaba con elles, que nos suxeríen, intentando qu’hubiere xotes, muñeires, habaneres, añaes, asturianada, ramos, valsiaos… Quier dicise, una muestra del repertoriu tradicional asturianu. Depués sentámonos pa pone-yos lletra y música y tamién pa pidir collaboraciones fuera, a músicos y lletristes que s’adaptaron a lo que-yos pidimos no referente a los ritmos pero que tuvieron tola llibertá del mundu pa interpretar cada historia a la so manera.

Humanes salió alantre gracies a un proyectu de crowdfunding ¿Por qué decidistis facelo asina y como foi la reacción de la xente?

Plantegámoslu como un proyectu global de discu y espectáculu. Ye un apueste caru, sobremanera porque somos munches componentes. El crowdfunding llanzóse porque nos facíen falta perres pal vestuariu y l’atrezzo. La reacción de la xente foi espectacular, ensiguida consiguimos lo que necesitábemos y entá más, lo que nos permitió poder facer una campaña de marketing. Ensin l’ayuda de tolos que nos patrocinaron nunca nun lo tendríemos llograo. Tamos mui mui agradecíes por ello.

«En Muyeres hai mui bones intérpretes, mui bones tocadores y grandes solistes, pero xuntes ye onde somos poderoses»

Nel discu y nel espectáculu nenguna de les intérpretes nin nenguna de les histories tien más protagonismu qu’otres ¿por qué se fixo asina?

En Muyeres tenemos mui claro que la fuercia ta nel grupu, non nes individualidaes. En Muyeres hai mui bones intérpretes, mui bones tocadores y grandes solistes, pero xuntes ye onde somos poderoses. Esti mou de trabayar, qu’espardemos a les histories que cantamos, nun val pa tol mundu, pero les componentes de Muyeres apostamos por ello. Ye la nuestra manera y nun nos va mal, tolo contrario.

Yá nun salís al escenariu col traxe tradicional…

El traxe tradicional abandonámoslu, ente comines, yá en País Malva. Dende entós contamos cola diseñadora Azucena Bedia que ye la que nos viste pa escena. A lo llargo de más de venti años Muyeres foi un referente nesti sentíu: queríemos ser tolo más respetuoses que se pudiere ser col traxe del país. Da-y valir, que se notare lo arguyoses que nos sentíemos por vistinos y salir con él a escena a interpretar música tradicional. L’espectáculu d’Humanes desendólcase nun momentu onde’l traxe tradicional diba ponenos munchos finxos. Lo mesmo pasa cola música o colo qu’interpretamos. Quiximos sentinos llibres de finxadures. Esto nun quier dicir que nun podamos volver a él en cualquier momentu. Quiciabes l’espectáculu próximu vaya ser vistíes col traxe tradicional, quién sabe…

¿Cómo afectó la crisis sanitaria y el confinamientu a Humanes?

Tuviemos mui mala suerte. Estrenemos en xineru depués d’un llabor durísimu. L’éxitu foi descomanáu y, d’esmenu, cuando tocaba’l momentu d’entamar la xira, de poder facer llegar a tol mundu’l frutu de tantu esfuerciu, llegó’l confinamientu. Ye como remar y remar p’acabar na oriella. Esperemos que podamos volver y que seya ceo. Agora mesmo ye difícil velo: somos munches persones n’escena, hai munchu movimientu… Volveremos, eso de xuru, somos Muyeres, esto nun va acabar con nós…

La música asturiana vive un momentu de recuperación de la tradición. Procesos como’l que se ta viviendo cola pandereta, por poner un exemplu ¿Tán teniendo voz les muyeres na escena de la música tradicional como nun se fixere enantes?

Hai integrantes de Muyeres que lleven cerca de trenta años xubiendo al escenariu a tocar y defender música tradicional y, al empar, participando o siendo directamente responsables de grupos que foron y son la base de munchos d’esos procesos de recuperación de los que fales. Muyeres siempre dio voz y siempre tuvo voz. Sicasí, nun me paez que seyan les integrantes o’l públicu que nos sigue los responsables de que la pandereta nun s’escuche. Podemos ver retrospectives de música tradicional d’Asturies onde nin se nos noma, siendo’l nuestru un grupu pioneru y únicu nesti campu. El porqué nun lo sabemos, pero ye claro qu’esto pasa. 

«Agora hai qu’intentar sobrevivir y retomar el trabayu onde lo dexamos»

¿Qué futuru-y espera a estes Muyeres? ¿Trabayáis en proyectos nuevos?

Muncho de lo que facemos ye posible gracies al llabor del nuestru representante Pablo Carrera que lleva con nosotres dende hai yá dellos años y la so productora A Mansalva, cola que fai tolo posible por cumplir coles nueses necesidaes y suaños. Como foi nel casu d’esti últimu discu nel que se comprometió de forma personal con grandes idees. Agora mesmo’l futuru ye tratar de sobrevivir y retomar Humanes nel puntu onde lo dexamos. Ye un trabayu que presta, nel que queremos dalo too de nosotres y que vamos disfrutar hasta onde podamos. En dalgún momentu va aportar esi futuru y taremos aguardándolu. 

DAMIÁN BARREIRO. Entrevista publicada orixinalmente nel Anuariu de la Música Asturiana 2020

“Humanes” de Muyeres yá a la venta y en toles plataformes dixitales


Dexa un comentariu

X