Pasaron seis años desque Ilustres Patilludos llanzaron Espicha o muerre, un EP de cuatro temes que daba continuidá al so estrenu –Chigrebilly, 2017- y nel que collaboraron dos míticos de la música’l país: Xune Elipe de Dixebra y Chus Pedro de Nuberu. Agora, los autoproclamaos «Reyes del Chigrebilly» tornen con una formación renovada y un soníu más crudu y festivu. ‘Empieza a beber’ ye’l primer single d’esta etapa nueva y nél andecha a la flauta’l míticu gaiteru José Manuel Tejedor.
«Tejedor tresforma una simple canción nun himnu», son les pallabres coles qu’Ilustres Patilludos valoren la collaboración nesti tema; una balada influenciada pol celtic punk, el folk asturianu y el rockabilly, esi amiestu de xéneros que da como resultáu el «chigrebilly» que los define. Precisamente ye nel chigre onde tien llugar ‘Empieza a beber’, una historia que fala de penes y amistaes con un mensaxe bien claro: «los perdedores nun muerren de sede».
Con esti llanzamientu, Ilustres Patilludos vuelven a l’actividá tres d’un parón d’un par d’años y un cambiu de formación. Asina, tornen pa da-y continuidá a una trayectoria qu’arrancó en 2011 y que los llevó a dar más de 300 conciertos y algamar dos nominaciones a los Premios AMAS. Con ‘Empieza a beber’ el «soníu non apto pa puristes», con un pie en Nashville, otru en Dublín y los dos plantaos nun llagar asturianu, va volver a percorrer les cais y chigres del país.
Suscríbite a les nuestres novedaes
