Dos años dempués del so últimu llanzamientu -el single ‘Col asturianu xugamos n’equipu‘, que fizo pal Día la Reciella-, y cuatro dempués del so estrenu discográficu, Mostru l’Horru vuelve. El proyectu de rap n’asturianu llanzó’l pasáu vienres en YouTube y en toles plataformes musicales ‘La partida’, un single con videoclip que reflexa tola so identidá: hip hop amestáu con otros estilos y una lletra de calter social.
«La partida fala del xuegu políticu. De cómo siento que tamos como pueblu frente a la situación política nos últimos años», desplica Fran Méndez, cabezaleru y vocalista del proyectu. A esto añade que musicalmente intenten «compensar el desaniciu de la lletra cola parte instrumental, metiéndo-y un ritmu funky que ficiera’l cantar más moviducu«.
El videoclip grabóse na sala Telva de Llangréu por Pablo Suárez, «cola collaboración de collacios dispuestos a facer d’actores», desplica’l raperu al rodiu d’un procesu de grabación que valora como «prestosísimo escribilu y grabalu; amás d’un videu graciosu ye un recuerdu pa tola vida». El productor del tema y encargáu de la grabación foi Zeros, componente tamién del grupu, y l’estudiu escoyíu La Casa Furia d’Uviéu.
Singles, discos y componentes nuevos
«Como’l discu va con muncho retrasu -y pidimos perdón por ello, pero ye que la vida a veces complícate los proyectos- decidimos sacar 3 o 4 singles al marxen de la banda nueva pa finar l’añu con bon sabor de boca», desplica Fran Méndez en rellación a los próximos llanzamientos. Amás, cunta otres novedaes: «Podemos confirmar dellos miembros nuevos como Diego (ex-Misiva) o Xuanín (La Tarrancha). Somos mui afortunaos de poder cuntar cola so aportación a les producciones de Zeros».
Al rodiu’l so segundu álbum, el vocalista de Mostru l’Horru afirma que «saldrá na primera metá del 2027 y tendrá alredor de 12 cantares». Nél, la banda va caltener la esencia del rap, pero con un «desplazamientu claru na mestura con otros estilos» onde «va ser too más baillable y animao«. Asina ye como esti proyectu va faciendo’l so camín a pasu sele pero firme, trabayando con xeitu nuna propuesta única na escena asturiana actual.



