Inaciu Llope y Xune Elipe falen sobre’l celtismu musical asturianu n’Uviéu

Esti vienres 17 de xunu, a les 19.30h, el Llar La Llegra d’Uviéu acueye un alderique sobre’l papel que tuvo y tien la referencia cultural atlántica na música tradicional asturiana. Pa ello van cuntar cola participación de dos espertos na materia: Inaciu Llope, miembru de la Fundación Belenos, y Xune Elipe, cantante de Dixebra y responsable de Goxe Producciones. L’actividá ye de baldre y asina la presenten dende la organización:

«Música celta, folk atlánticu, música de raigañu, “lo tradi”… Son toos términos que vienen emplegándose pa referise a les estremaes corrientes musicales a les que vien adscribiéndose’l movimientu musical asturianu nes últimes décades. Anguaño, col españíu de la pandereta, lo electrónico y la presencia n’espacios d’intercambiu internacional, ye un bon momentu pa echar una güeyada atrás y ver d’u surde esta tradición musical y qué siendes y oportunidaes tien pa siguir construyendo nel futuru una Asturies cola so propia cultura viva y vivida.

De la mano de los ponentes, espertos en primer persona de la construcción de “lo celta” nel ámbitu asturianu, vamos poder da-y una vuelta a la vixencia d’esti marcu cultural p’aldericar, a la fin, sobre la manera na qu’ha representase Asturies a sigo mesma».