L-R llancen una campaña de crowdfunding pa financiar el so tercer discu: ‘V.O.S’

Yá hai mes pal llanzamientu de V.O.S, el tercer trabayu discográficu de L-R. Tres d’asoleyar los singles “Anda neña“, “Trébole” y “Menodito“, el dúu de post-folk asturianu anuncia que Versión. Orixinal. Subtitulada (V.O.S) va ver la lluz en febreru en plataformes dixitales y, si algamen el crowdfunding, en CD y vinilu. Como yá fixeran n’anteriores ocasiones, Leticia Baselgas y Rubén Bada entamen una campaña na plataforma Verkami na que pue sofitáse-yos faciendo aportaciones ente los cinco y los ochenta euros.

«Esti discu pieslla un ciclu na nuesa trayectoria, asina que vei ser mui especial en tolos sentíos. Veis atoupar, como siempres, el soníu L-R pero abriendo nuevas posibilidades sonoras; nuevas capas nas que afondar ya siguir trazando ya ensanchando el nueso universu musical», comenta’l dúu sobre esti álbum que continúa’l camín abiertu con post-folk-asturianu (2018) y N.O.S (2021). Amás, avancen que van tar «mui bien acompañaos por grandes amigos ya artistas como Los Hermanos Cubero, el Coru Al Altu La Lleva ya munchos» que van dir anunciando nos prósimos meses.

V.O.S. venceya tres conceptos: Versión. Orixinal. Subtitulada. «Son importantes porque creyemos que la música de los pueblos ía un actu d’amor; dalgo pulsional que nunca nun vei ser nin orixinal, nin inamovible porque tresmítese siempre como versión; eso ía lo que fae que la so guapura miedre de voz en voz a lo llargo de los sieglos», desplica’l grupu. Añaden tamién que’l album «fala dende la voz de los llugares; fala dende la musicalidá de las pantasmas ya los símbolos. Y nós dámosvos dellos “subtítulos” pa que vusoutrxs mesmxs imaxineis a esa “voz ensin nome” que fai muncho más grande los soníos de la nuesa memoria colectiva».

Vinilu y presentación

«Queremos pidivos sofitu pa poder espublizar un discu de vinilu de V.O.S. Queremos apostar por esti formatu físicu porque, anque el discu vei tar en tolas plataformas dixitales, siguimos pensando no guapo que ía tocar ya sintir las cousas directamente; tenelas en casa ou querelas ya valoralas polo que son ya non por cómo imaxinamos que son», argumenta’l dúu, que necesita algamar enantes del 20 d’avientu los 2.500 € que posibiliten la fabricación del CD y vinilu. La campaña en Verkami inclúi delles recompenses y les aportaciones van dende los cinco euros hasta los ochenta euros. Dientro d’elles destaca que, amás del vinilu, inclúise la entrada pa la presentación en directo del trabayu, prevista pal 10 de febreru na Sala Acapulco de Xixón.

Merca discos de L-R na tienda online y siéntilos nes plataformes dixitales