L’asociación Escontra’l Raigañu continúa les sos actividaes dedicaes a la cultura popular asturiana. Güei, martes 14 de payares, ábrese’l IX Filandón con un programa nel qu’hai visites guiaes, charres y el sábadu una tarde en danza colos Pandereteros d’Anguaño y les Pandereteres Escontra’l Raigañu. Too ello de baldre y en Llaranes.
Una visita guiada al Aula Didáctica de Cultura Popular Asturiana -asitiada na Plaza Mayor 7-3ª Planta- entitulada Formes de vistir, maneres de vivir inaugura estes xornaes culturales de seronda. Va haber dos pases: ún a les 19h del martes 14 y otru a la mesma hora’l miércoles 15. Pal vienres 17, tamién a les siete la tarde, el Centru Sociocultural de Llaranes acueye la charra-alderique Cultura tradicional y llingua asturiana, ónde y cómo se deprende. Fonsu Fernández, director del Muséu de la Gaita de Xixón, Marisa Luque, presidenta d’Escontra’l Raigañu y Rodrigo Joglar, director de la Banda de Gaites LaKadarma-Escuela de Música tradicional van facer un repasu peles iniciatives públiques y privaes col oxetivu de ver «llogros y pilancos y, a mayores, una posible axenda coles aiciones que se precisen cara al porvenir», como comenten dende la organización de les xornaes.
Pa zarrar esta novena edición de Filandón el sábadu 18 hai doble actividá nel Centru Sociocultural de Llaranes. A les 19h Maite Capín da la charra Tintes de película, una forma de vida nel sieglu XXI y a les 20h hai tarde en danza coles actuaciones de Pandereteros d’Anguaño y les Pandereteres d’Escontra’l Raigañu. La entrada ye llibre y va haber sidra’l duernu, castañes magostaes y dulces de calabaza.
Suscríbite a les nuestres novedaes
