Vero Rubio gana’l XV Premiu Camaretá con “Dixo miou padre”

“Dixo miou padre“ ye la canción ganadora del XV Premiu Camaretá al meyor cantar en llingua asturiana. La multiinstrumentista de Cangas de Narcea, componente de formaciones como Orquesta Céltica Asturiana, estrena la so carrera en solitario algamando esti gallardón. Col so cantar impúsose nuna complicada votación a los otros tres finalistes, obra de renomaos proyectos dientro de la música’l país: “Tonada” de Marisa Valle Roso, “Zanca de Cabra” d‘Alienda y “Les tos nales” de José Manuel Tejedor. La edición tuvo marcada por evidentes déficits de soníu y iluminación que, tanto nel Teatru de la Llaboral como na posterior emisión de la TPA, desllucieron la gala final d’esti necesariu reconocimientu públicu del Gobiernu del Principáu d’Asturies a la música n’asturianu.

Esther Fonseca y Miguel Ánxel Montenegro guiaron una gala na que, repitiendo’l formatu d’otros años, foron alternándose presentaciones de los artistes, videos con entrevistes y les actuaciones. Vero Rubio foi la primera en xubir al escenariu col so tecláu y la so voz, acompañada d’un tríu de cuerda y de dos coristes. Con una lletra escrita n’asturianu occidental que llama a que cada persona escueya llibremente’l so propiu camín al marxe de dictámenes sociales y una melodía ente’l pop y la canción d’autor, trescurrió la interpretación d’esti “Dixo miou padre”, un tema guapu, sele y emotivu na que Rubio anicia con xeitu’l so camín na música n’asturianu.

Marisa Valle Roso foi la siguiente en pisar l’escenariu de la Llaboral. La so actuación tuvo precedida por un videu na que, amosando tola so seguridá y tables como artista, desplicaba les razones de por qué se presentó al premiu con “Tonada”, faciendo un llamamientu a la renovación dientro de l’asturianada pa la so supervivencia. Con esa intencionalidá fizo una reinterpretación distinta d’esti cantar -publicáu primero en castellanu nel so discu últimu, Lo Fugaz, y llueu interpretáu n’asturianu nos sos directos-, na que tuvo acompañada de batería y teclaos. La so potente voz sonó y rellumó, pero non la so guitarra nin los efectos, quedando la orixinalidá de la canción perxudicada ente los oyíos del públicu y telespectadores por unos problemes de sonorización que diben caltenese a lo llargo la gala.

Una añada tradicional ye la base sobre la que’l grupu power folk Alienda compuso “Zanca de cabra”. La reivindicación tampoco faltó pela so parte: la lletra tien un mensaxe d’empoderamientu femenín y la banda fizo un llamamientu nel so videu de presentación a que la llingua asturiana tenga’l prestixu necesariu. Nel escenariu interpretaron esti cuidáu cantar enllenu de matices instrumentales que, una vuelta más, nun se pudieron percibir. La iluminación tampoco acompañó, una colorada lluz escura dificultó ver a los seis componentes del mozu grupu hasta’l tramu final de la interpretación de la canción.

Otra balada más diba zarrar la gala; “Les tos nales” de José Manuel Tejedor. Ún de los más prestixosos gaiteros del país interpretó esti emotivu cantar dedicáu a la perda d’una bona amiga. Acompañáronlu tamién renomaos músicos -a los que-yos afectó tamién los mentaos problemes de soníu-, amás de la so fía, Julia Tejedor, que fizo una maxistral interpretación vocal y marcó la diferencia cola versión del discu, grabada tamién con xeitu por Loreto Suárez d’Algaire. Xunto a ellos tuvo la xoven baillarina Mara Suárez, que-y dio más color y calor escénicu a un tema qu’enriba les tables axuntó veteranía y mocedá dientro de la escena musical asturiana.

Mentanto actuaron Algaire, ganadores del XIV Camaretá con “Coral y Maera“, cada miembru del xuráu -formáu pola música y periodista Alicia Álvarez; el periodista y promotor musical Xicu Ariza; la técnica en normalización llingüística Penélope Miranda; la docente d’asturianu y violinista Naomi Suárez; y la docente d’asturianu y panderetera Emma Posada-, puntuó del 1 al 4 a caún de los finalistes, conscientes tamién de los evidentes problemes técnicos d’esta gala. Vero Rubio y la guapura cenciella de “Dixo miou padre” resultó la ganadora d’una difícil votación na que toles propuestes taben bien valoraes.

Mui emocionada y agradecida, la música de Cangas de Narcea recoyó’l troféu y dedicó a tola xente que la arrodia esti premiu otorgáu pol Gobiernu del Principáu d’Asturies qu’inclúi 6.000 euros en metálicu, la realización d’un videoclip y participar dientro del circuitu Autores nel Camín. D’esta manera zárrabase la XV edición del Premiu Camaretá al Meyor Cantar, un gallardón nel que tolos años compiten nomes veteranos y primerizos de la música n’asturianu, dando asina la posibilidá d’otorgar reconocimientu a quien lleva toa una carrera comprometida col asturianu y oportunidaes a quien quiera continuala calteniendo un compromisu col idioma.

La edición d’esti 2023 destacó por una mayor y meyor promoción a traviés de cartelería na cai y una afluencia de públicu que cuasi enllena’l Teatru de La Llaboral; por una presencia de cargos institucionales que quedó reducida a Antón García, director d’Acción Cultural y Normalización Llingüística del Gobiernu del Principáu d’Asturies -quien lleó tamién l’acta del xuráu-, y polos errores técnicos que nun-y ficieron xusticia al prestixu d’un premiu que ye necesariu caltener y cuidar, al ser ésti l’únicu reconocimientu institucional del qu’anguaño gocia la música n’asturianu.

Semeyes d’Isabel Lobo Huerta, cedíes pola Viceconseyería de Cultura, Política Llingüística y Deporte.