Yá ta a la venta na tienda online de musicasturiana.com y disponible en toles plataformes dixitales el nuevu discu de la Banda Gaites Fonte Fuécara, Gaiteros, un percorríu polos mayestros del instrumentu con composiciones inédites, melodíes tradicionales y una montonera collaboraciones. Foi un resultáu de cinco años de llabor y la presentación del álbum ye mañana, sábadu 23, a les 20h na Escuela de Música de Llanera.
En pallabres de Rodrigo Molinos -co-director de la banda-, el discu contién una selección de «sets de diferentes gaiteros tradicionales hasta gaiteros más contemporáneos, con un tema de Fabián Fernández, Javi Tejedor, gaiteros de siempre como’l Gaiteru de Veriña, el Gaiteru Lliberdón, Remis… Tenemos un set tamién al que-y damos cierta importancia porque recueye a los mayestros gaiteros que foron el nexu ente estos gaiteros tradicionales y les nueves xeneraciones, con composiciones de Manolo Quirós, Pedro Pangua y Xuacu Amieva«. Amás de los sets instrumentales, el proyectu cuenta coles voces de Marisa Valle Roso, que canta l’asturianada ‘Anda y señálame un sitiu’ acompañada pol pianista Jacobo de Miguel; y Héctor Braga, qu’interpreta dos melodíes que’l Gaiteru Lliberdón solía cantar y tocar al mesmu tiempu, ‘La Panadera’ y la ‘Muñeira Cantada’. Decidieron incluyir tamién, pa zarrar l’álbum, ‘Maruxina de Santibanes’ de Tuenda, pola referencia que fai l’estribillu a la figura del gaiteru.
Fonte Fuécara entamó a grabar Gaiteros en 2019 pol so 40 aniversariu de la mano d’Elías García a la producción, nos Tutu Estudios de Corvera. La so perda inesperada y les torgues derivaes de la pandemia de COVID-19, impidieron el desendolcu normal del proyectu. Sicasí, la banda lleva dellos años enfotada nel discu -qu’aporta al formatu físicu con diseñu d’Antón Barquero- y esperen con ilusión la so presentación esti sábadu en Llanera, un eventu nel que van participar les persones y músicos que collaboraron nel procesu, amás de delles sorpreses qu’entá nun quieren desvelar.
45 años calteniendo la tradición
La Banda Gaites Fonte Fuécara fundóse nel 1979 en Pruvia (Llanera). Dende entós, como comenta’l so co-director Fabián Fernández, el camín de la formación foi y sigue siendo’l de caltener la tradición -asina decidieron nomar el so primer discu, Caltener (2009)-. «Con esti discu y los 45 años de la banda, siguimos la mesma esencia que tien dende l’entamu, la de caltener les tradiciones musicales y el folclor astur, siempre dende la perspectiva de lo que ye una banda gaites, pero englobando tolo que ta al rodiu’l mundu la gaita: baille, percusiones, cantares, indumentaria… Somos una banda gaites pero nun dexamos esa parte del colectivu tradicional nos trabayos que facemos», apunta’l gaiteru. Sobre’l momentu nel que s’alcuentra Fonte Fuécara anguaño dempués d’estes más de cuatro décades, confiesa: «Tamos nel puntu d’eso mesmo, siguir calteniendo, que pasen les nueves xeneraciones y que la banda siga siendo esi instrumentu capaz de mantener la nuestra herencia«.
Suscríbite a les nuestres novedaes
