La Banda Sonora de Bárbara González-Quevedo
Bárbara González-Quevedo (Uviéu, 1990) ye una de les muyeres moces más actives de la música asturiana. Lleva pisando escenarios dende que yera una rapacina y nel añu 2013 foi una de les fundadores del grupu folk Alienda, del que ye cantante y vigulinera y col que ta acabante d’asoleyar el single “Zanca de cabra”. Amás, tamién ye parte del colectivu Muyeres col que toca’l vigulín, la pandereta y canta.
Con ella siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevista escueye los 20 cantares -12 n’asturianu y 8 de fuera- que más-y presten.
Sienti la playlist La Banda Sonora de Bárbara González-Quevedo
Un discu qu’enxamás canses de sentir.
Yá!, de Felpeyu.
Si tuvieres que formar parte d’otru proyectu musical, ¿cuál sería?
Prestaríame muncho un grupu de bluegrass tipu Nickel Creek.
De los cantares que compusisti o interpretes, ¿cuál ye’l to preferíu?
El que más me presta ye Zanca de cabra, pola fuercia que tien y porque tien un gran valor sentimental pa mi.
«Convidaría a la vigulinera Sara Watkins porque m’encanten tolos sos proyeutos musicales y prestaríame muncho falar un poco con ella y que cantáremos y tocáremos unos temes xuntes»
¿Cuándo foi la primer vez xubisti per primer vez a un escenariu y que pasó enantes, durante y depués?
La primer vez foi cuando tenía 9 años, allá por 1999, nuna actuación de navidá de la escuela onde entamé a tocar el vigulín. Fueron emociones nueves y prestoses pa mi… Enantes taba nerviosísima, durante tamién y al acabar taba mui contenta y arguyosa por ser pa tocar delantre tanta xente desconocío siendo tan nueva y con esos nervios.
¿Qué ye lo más inxusto de ser artista?
Yo creo que les grandes dificultaes qu’hai pa poder vivir d’ello y lo poco que se ve tol trabayu qu’hai detrás de cada discu, de cada tema, de cada conciertu…
Si fueres Conseyera de Cultura, ¿qué son les primeres coses que fadríes?
Puxar pola llingua, la música y la lliteratura asturianes con más facilidaes pa tolos que se mueven per estes estayes, amás de munchos más conciertos, presentaciones de llibros, xuntances musicales y lliteraries y una buena promoción y esplotación de la nuestra riquísima cultura na RTPA.
«Prestaría muncho una película d’un de los mios llibros favoritos, que ye ‘Hestoria de la mia vida’, d’Eva González. Ye un llibru que la mio güela dexó escritu pa que s’asoleyara una vez que yá nun tuviera ente nós y que trata sobre la so vida dende que ñació»
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
D’Asturies son Dixebra y Felpeyu los que me marcaron dende bien moza.
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches “na intimidá”?
Podría dicivos que nos karaokes suelo pedir dalguna d’Álex Ubago…
¿A qué personaxe públicu convidaríes a un conciertu tuyu, a pasar llueu pel backstage y pa qué?
Creo qu’a la vigulinera Sara Watkins porque m’encanten tolos sos proyeutos musicales y prestaríame muncho falar un poco con ella y que cantáremos y tocáremos unos temes xuntes.
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
Pues esto yá lo pensé dalguna vegada y me prestaría muncho una película d’un de los mios llibros favoritos, que ye Hestoria de la mia vida, d’Eva González. Ye un llibru que la mio güela dexó escritu pa que s’asoleyara una vez que yá nun tuviera ente nós y que trata sobre la so vida dende que ñació, centrándose sobre too nun momentu mui difícil, que ye’l de la guerra, y cuntando cómo tuvo a piques de morrer y cómo consiguió escapar del so pueblu, Palacios del Sil, pel monte alantre y volver cuando por fin finó too. Paezme dignu de película y sedría mui emocionante pone-y la música.
