El grupu folk Alienda llanza cantar nuevu, “Zanca de Cabra”
Vuelven Alienda. Dempués d’asoleyar el so primer EP en 2014 y tres dellos años d’inactividá por mor de la emigración de dellos componentes y l’andanciu, la formación moza de folk regresa con “Zanca de Cabra“, un cantar que yá ta en toles plataformes dixitales, escrito n’asturianu occidental, con lletra de Roberto González-Quevedo y compuesto sobre una pieza tradicional.
«Esti tema nació a partir d’un cantar tradicional que-y prestaba abondo a la güela de Bárbara -violinista del grupu-, Eva González, y que cantaba muncho» , comenta Fran Rodríguez, guitarrista de la formación. El músicu esclaria que d’esta pieza recoyeron la primer parte y el resto la lletra ye del escritor Roberto González-Quevedo. Amás, ye’l primer tema que’l grupu canta n’asturianu occidental; «una variante que dalgún de nós lleva na sangre», añade Rodríguez.
«Quiximos tresmitir bien de fuercia a traviés de la música y tanto nesti tema como nos que tán por venir, creyemos que vais poder sentir una Alienda más madura, pero cola esencia de siempre», opina’l guitarrista sobre “Zanca de Cabra”. Amás, destaca que la lletra trata sobre «una muyer diferente y con un carisma especial y va rellatando momentos destacaos na so vida». A la fin, enerxía puro pa da-y forma al regresu d’Alienda dempués de 8 años ensin asoleyar material nuevo.
Primer discu de llarga duración
«Siempre tuvimos en mente l’oxetivu de grabar un discu, tenemos material pa ello y agora’l nuestru enfotu ye acabar la grabación, que namás mos dio tiempu a grabar dos cantares, y dempués de que salga’l nuesu primer llarga duración, tamos naguando por tornar a los escenarios», el músicu resume asina los próximos pasos d’Alienda, una banda que sufrió’l «xarru d’agua frio de la realidá social del país» que causó «varies baxes de xente que coló d’Asturies por mor de trabayu o estudios». Agora, recuperaos del andanciu y con una mayor estabilidá nos sos componentes, van a por toes y con esti cantar nuevo lo demuestren.
