La Banda Sonora de Delfín Valdés

Delfín Valdés, “Delfo”, ye una de les persones más veteranes y actives de la cultura asturiana. De L’Entregu, teatreru, performer, comediante, activista de milenta causes sociales, diseñador gráficu, músicu… Foi fundador en 2003 de La Tarrancha, banda de mecigayu ska de la que ye cantante. Tamién pon voces nel grupu de hip hop n’asturianu K-Nalón y tien participao en proyectos musicales colectivos como’l de Soncai System o Músicos Pola Oficialidá. Tamién pincha temazos con Nochnepiche Esbilla, ente otres munches coses.

Con él siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Sienti la playlist La Banda Sonora de Delfín Valdés

Semeya de José González Roces.
Un discu qu’enxamás canses de sentir.

Nun creo que tenga un discu namás. Cuando garro un discu nuevu, o ún vieyu qu’acabo descubrir, escúcholu, siéntolu, “doi-y otru apretón al llagar” hasta sacar tolo que tien dientro. Eso fáigolo con casi toos, y casi siempre, depués d’un tiempu vuelvo garralu otra temporadina. Por eso, que paézme complicao esto d’esbillar venti canciones namás.

Si tuvieres que formar parte d’otru proyectu musical, ¿cuál sería?

Va tres años así que vengo dando-y vueltes a faer un proyeutu, pero préstenme tantes coses… que la idea acaba en distintos posibles proyeutos que namás queden na mio tiesta. Esti añu si saco tiempu y, m’enfoto, a ver si iguo daqué acústico, sobre too cuerda, pañando coses de la música tradicional d’Asturies y otres partes del mundu, con lletres nueves y eso y un tastu a les montañes Apalaches. Pa eso fain falta compañeres de viaxe, y soi mui cortáu a la hora entra-y a la xente. Soi más de que m’entren y debo ser mui feu o cantar mui mal (rises). 

De los cantares que compusisti o interpretes, ¿cuál ye’l to preferíu?

Meca, nun sé dicivos, andarán peles ciencuenta. Nun sé si son munches o poques p’andar escoyendo, pero a les fiyes quiéroles a toes igual (rises). Bueno alguna igual un poco menos (rises).

«Esti añu si saco tiempu y, m’enfoto, a ver si iguo un proyectu musical acústico, sobre too cuerda, pañando coses de la música tradicional d’Asturies y otres partes del mundu»

¿Cuándo foi la primer vez que xubisti a un escenariu y que pasó enantes, durante y depués?

Musicalmente… de rapacinos, faciendo un “pleiba” de Los Rebeldes. Fixímoslo polvo. Enantes foi muncho curro, faer los istrumentos, ensayar, preparar el vestuariu… depués nervios. ¿Durante? Pos pasalo pipa, y depués volver a por más. Ah sí, y meteme de lleno nel rockabilly con 12 o 13 añucos.

¿Qué ye lo más inxusto de ser artista?

Artista ye tol mundu, o casi tou. Otra cosa ye dedicase al arte. Sí la precariedá impera en tolos ámbitos de la vida, nel arte entá más. A eso hai que xunta-y la incomprensión de la so propia problemática pola mayor parte la xente.

Si fueres Conseyeru de Cultura, ¿qué son les primeres coses que fadríes?

Paso, prefiero ser Conseyeru de Sanidá, la salú lo primero. Ta la cosa mui mala y hai que poder meter a la to xente arriba nes llistes d’espera, quirófanos, residencies, prebes… Ye más o menos lo que fai un Conseyeru de Cultura, ¿non? Colocar amiguinos.
Ná, en serio, ésmuelme más les coses que nun tamos fayendo por nós mesmes, autoorganizandonos, creando, fortaleciéndonos… que lo que pueda faer un puntu solu. Creo que la cultura ye otru espaciu más onde la sociedá asturiana acoxa a la hora de costruyir una base fuerte y potente. Dende les istituciones puen faese coses, claro, pero ¿de qué val programar X programación cultural si nun hai ná detrás?, eso ye un decoráu de papel cartón.

«Dende les istituciones puen faese coses, claro, pero ¿de qué val programar  X programación cultural si nun hai ná detrás?, eso ye un decoráu de papel cartón»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Tola vida viví n’asturiano, de pequeñu incoscientemente, yera lo de casa, de más mayor vas formándote y vives n’asturiano de forma cosciente, taba claro que si algún día facía música diba ser n’asturiano. Creo qu’enantes de la música foi la etapa del teatru de cai, el monólogu, el performance. Anque hebo grupos n’asturianu que me marcaran, ta claro que’l referente, en tolos aspeutos, foi Dixebra.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Culpósamente nun escucho ná, y escucho muncho “de too” (menos comercial). Pero sí ye verdá que colos años reconózo-y ciertu méritu a dellos artistes qu’antañu non, como Manolo García, por poné’l casu.

¿A qué personaxe públicu convidaríes a un conciertu tuyu, a pasar llueu pel backstage y pa qué?

¿¿Convidar a un conciertu??  ¿¿Un personaxe públicu?? Que pague como too quisqui!!

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Lluvia d’agostu, de Paco Alvarez. Seguro qu’acababa metiéndo una revisión d’algún tema de Chicho Sánchez Ferlosio. 

Asina fala Delfín Valdés de los cantares qu’escoyó pa la so playlist

1. Ramala. Dixebra. 2009.

Temazu de los más acústicos de Dixebra. Nun ye de los míticos himnos, pero nun se pue dexar pa prau.

2. Onde La Mar . Balandrán.

Pa mí, una de les meyores canciones n’asturianu. La lletra sobremanera… tiénlo too. La voz de Javi, pasó a la eternidá pa munches de nós con esti cantar.

3. Rigu Esva. Llan de Cubel. 1991

Hai munches de Llan de Cubel que me presten más, pero esta marcó pa mí el descubrimientu, el espertar al folk asturianu, pa enriba con aquel vidio… Púnsome la cabeza pates pa riba y empecé de cero otra vez col conceutu sobre la música.

4. Denotabazio. Cambaral. 1994

Temazu con lletra en plan d’eso qu’agora llamen “random”. Música ensin complexos en tiempos de folkis acomplexaos. Agora que yá nun hai esi “purismu” sedríen mui “prestosocool”, d’aquella yeren unos apestaos pa según que xente.

5. La Foguera. Skontra. 2015

Si a alguien nun se-y aprieta’l puñu y nun-y calienta’l corazón con esta canción ye que nun tien sangre. Tán bien Skontra, pero son unos chungos. Hehe ye mentira, son too amor.

6. Internacionalista. Skama La Rede. 2005.

El repertoriu de Skama ta enllenu d’himnos políticos y folixeros, creo qu’Internacionalista ye ún de los imprescindibles. Cuando nun la baillo, véome con Labordeta de botellón, nuna tierra que ponga, Llibertá.

7. Tiempu de povisa. Fala Non Caduca. 2010

Temazu d’esta banda que llevó’l tiempu, como la povisa y, que pa mí podíen haber llegao ser una gran banda a nivel estatal.

8. Mañana ye otru día. Soncai System. 2007.

Temazu de Sergio Rodriguez, nun proyectu, Soncai System, nel que participemos unes cuantes. Tuve la suerte de que Xune y Sergio me convidaran a pone-y lletra y char unes voces.

9. Los Fayeos de Mayo. Felpeyu. 2003

Pa que voi decir ná. Sobren les pallabres.

10. Héroes ensin nome. Misiva. 2020

Apertar los puños, pegar un brincu y xiringar la cabeza (el pelo quien tenga, claro). Enerxía positivo.

11.. Manolo por favor. Los Berrones. 1992.

Los Berrones, la banda sonora real de lo cotidiano de l’Asturies rural y de la mediourbana. ¿Quién nun se sintió identificáu nes sos canciones?

12. Lliberar l’amor. Nuberu. 1978.

Temazu “buenrolleru”, ensin estribillu nin tabús. El ñiciu de la banda sonora indispensable de munches de nosotres, qu’aprendimos les sos canciones en chigre enantes que de los discos.

13. Liberar as arterias. Ses. 2020

Toa una declaración d’una de les más grandes cantautores del estáu y, d’esti noroeste que ye la nuestra casa.

14. Libremente. Labregos do tempo dos Sputniks. 2016

Esti tema namás ye un cachín d’un esperimentu de poesía, canción de cantautor, rap y actitú punk, que mientres dellos años pudimos disfrutar en conciertu. Menos mal que-yos dio por ceder y acabar grabando. De lo meyor en munchos años.

15. Sonajeros. Dusminguet. 1998.

Pa movelo per tola casa. Pidi salir fuera y dir pela cai al ritmu d’esta gran banda de La Garriga. Depués d’ellos hebo un cambiu na música mestizo.

16. Danza de los nadie. Hechos contra el decoro. 1998.

Naide diba algamar un soníu urbanu y de fusión como’l d’esta banda. Con actitú y una calidá de la de so madre. ¿Nun vos entra la gana de salir enbozaes? (Y non pol coronavirus, non).

17. Señor matanza. Mano negra. 1994.

Ragueton? Ton ton ton!! Miel de milenta flores esmielgao cola fuerza centrífuga y entafarrando los 90 con creatividá puro.

18. Suave. Eskorzo. 2014.

Tema mui cumbieru d’estos granaínos que tienen calidá caldía, pa faer bien tolo que-yos salga de les coraes.

 19. Adicted to bad ideas. The World/Inferno Friendship Society. 2007.

Actitú punk, cabaret y muncho más, non too van ser distorsiones. Nun tenéis una idea buena, castrones? Pos a gozalo!

20. Ain’t Got No, I Got Life. Nina Simone. 1968

Una muyer d’almes enllenar. Nun tenemos ná, pero tenemos muncho.

21. Itxoiten. Negu Gorriak. 1993.

Nunca una canción lenta y falando de la Muyer, foi tan cruda, dura y cañera al mesmu tiempu. Esta va como pingaratina de toles que podría poner de los distintos proyectos de los Muguruza.

22. Unza Unza Time. Emir Kusturica and the No Smoking Orchestra. 1998.

La música d’inspiración balkánika ye pa mi fundamental dende la segunda metá de los 90. Pongo esta como representativa d’esi unza unza. El cine de Kusturica y la importancia que-y dio a la música nél, son importantes pa entender la so situación anguañu. Meyores exemplos pueo poner, pero pa muestra un botón.

Meca nun me dio sitiu pa poner una de La Tarrancha!!

Mercar discos de La Tarrancha


Dexa un comentariu

X