La Banda Sonora d’Iván Testón

Iván Testón (La Pola Siero, 1993), con raigaños en Casu, ye miembru de los grupos Cuévano y Fayéu, dos bandes de creación recién nes que, principalmente participa como coordinador y lletrista, yá que prefier tar más al marxe de los escenarios.

Cuévano integra a músicos y voces de gran trayectoria y relevu xeneracional: Xuacu Amieva, mayestru gaiteru; José Alfredo Cordero, voz curtida nel tiempu y saxofonista; Dani Álvarez, multiinstrumentista y referente del folk asturianu; Simón San José, luthier y percusionista; Carlos “Carlinos” Velasco, voz masculina potente; Alicia Villanueva, voz femenina escepcional; Chino el Indio, guitarrista rockeru; Julio Rodríguez, bouzukista y vigulinista xoven; Alex “Petu”, baxista y produtor musical; Leti Cienfuegos, corista y creadora audiovisual; Alba Cuadra, corista y responsable del merchandising; y, a lo último, l’home que pon la banda sonora, Iván Testón, coordinador del grupu y xestor de tola loxística.

Con él siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Un discu qu’enxamás canses de sentir.

Aire na Rampla, ye’l primer discu de la Banda Gaites El Gumial, nel que Cuévano participó activamente. Ye un discu llamáu a revolucionar el conceptu de banda de gaites que teníemos hasta la fecha. Una banda preparada pa competir coles grandes bagad del Arcu Atlánticu.

Si tuvieres que formar parte d’otru proyectu musical, ¿cuál sería?

Mota Blues, igual de forma imparcial, porque ye la banda del mio collaciu Chino el Indio. Mota tresmite una enerxía que ye mui difícil de xenerar y les rises y el bon rollu siempre tán presentes na so música y nos sos bolos.

«Si tuviera que quedar con un momentu sedría cola presentación del mio collaciu Carlinos Velasco na presentación de Cuévano. Foi un momentu mui emotivu pa los dos que voi llevar siempre conmigo»

De los cantares que compusisti o interpretes, ¿cuál ye’l to preferíu?

Ye difícil escoyer ente pá y ma. Si tengo que quedame con uno quedaríame con ‘Tierra de madreñeros’. Al final cada cantar tien la so historia y el so procesu y ye difícil dicir unu.

¿Cuándo foi la primer vez que xubisti a un escenariu y que pasó enantes, durante y depués?

Suelo subir pocu, el mio trabayu ta detrás. Si tuviera que quedar con un momentu d’esos sedría cola presentación del mio collaciu Carlinos Velasco na presentación de Cuévano. Foi un momentu mui emotivu pa los dos que voi llevar siempre conmigo. Foi un día especial y de munchos nervios, enantes del conciertu el sofitu de la xente nun se m’olvida. Nel conciertu hebo un momentu nel que tol públicu cantaba ‘L’altu Nalón’ que va ser difícil borrar de la memoria.

¿Qué ye lo más inxusto de ser artista?

Tien muches coses inxustes pero, ensin dudalo, la falta de reconocimientu dientro d’Asturies a los propios artistes asturianos ye una de les coses que me paecen más inxustes.

«Na vida siempre fui de referentes, tanto musicales como personales. Xuacu Amieva axunta les dos coses, namás hai una cosa per enriba del so talentu y ye la gran persona que ye»

Si fueres Conseyeru de Cultura, ¿qué son les primeres coses que fadríes?

La nuesa llingua tien que ser oficial yá, sedría lo primero. Amás, gustaríame que la madreña y l’oficiu de madreñeru se pusieren en valor y se conservaren.

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Ensin duldar, Xuacu Amieva. Na vida siempre fui de referentes, tanto musicales como personales. Xuacu axunta les dos coses, namás hai una cosa per enriba del so talentu y ye la gran persona que ye. Pone-y lletra a la ‘Marcha de brañes’ foi un suañu cumplíu pa mi. Dende que lu conocí, la so esperiencia y los sos conseyos márquenme’l camin. Nun puedo tar más agradecíu.

«Ensin duldar, Xuan Bello xunto con Daniel Velasco son les dos persones nes que más me fixo a la hora d’escribir»

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Dacuando confúndese l’algoritmu y ponme reggaeton. Ye difícil nel globalismu que vivimos tar al marxe d’influencies d’esi tipu…. Suelo escuchar música de tolos tipos y creo qu’ehí ta la riqueza.

¿A qué personaxe públicu convidaríes a un conciertu tuyu, a pasar llueu pel backstage y pa qué?

Rodrigo Cuevas. Ye un referente dientro y fuera d’Asturies, como persona y como músicu. Siempre ye importante nos conciertos y depués arródiase de xente con bona enerxía, de xuru qu’echaríamos unes rises.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Hestoria universal de Paniceiros, de Xuan Bello. Ensin duldar, xunto con Daniel Velasco les dos persones nes que más me fixo a la hora d’escribir. N’alcordanza d’estes dos grandes persones y artistes.