Juanjo Díaz (Nava, 1981) ye ún de los percusionistes más pernomaos d’Asturies. Ye músicu profesional llicenciáu en Percusión pol Conservatoriu Superior de Música «Eduardo Martínez torner», docente, componente n’actualidá de les bandes de Rodrigo Cuevas, José Manuel Tejedor, La Maramoniz, Algaire, Cerezal… Tien participao nunes cuarenta grabaciones; collaborao con una montonera formaciones que van dende orquestes hasta agrupaciones de música tradicional, pasando por bandes heavy metal; y tocao per países como China, EE.UU, Kuwait, Dubái, Colombia o Escocia. Tamién algamó importantes premios en solitario o colos proyectos musicales nos que participó.
Con él siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Semeya Pavlin Nava.
Canso de sentilos toos!! Cuando engancho con dalgo, escúcholo de manera compulsiva y llueu déxolo un poco de llau. Cada etapa de mio vida ta marcada por unos estilos o grupos bien distintos y volver a sentir esos discos, faime regresar a eses etapes. Por eso nun podría quedame con unu namás.
Siempre formé parte de proyectos que teníen que ver cola música tradicional o’l folk, asina que creo que me gustaría formar parte de daqué que s’alloñara d’esi estilu. El funk sería un estilu que creo que me llenaría. Disfruté muncho d’un conciertu de Vulfpeck que vi fai un par d’años, la enerxía que tresmitieron, el bon rollu, lo buenísimos que son toos. Puestos a pidir… Vulfpeck molaría.
«Siempre formé parte de proyectos que teníen que ver cola música tradicional o’l folk, asina que creo que me gustaría formar parte de daqué que s’alloñara d’esi estilu. El funk sería un estilu que creo que me llenaría»
Por desgracia componer cero, asina que tendría que quedame colo d’interpretar. Diría el ‘Xiringüelu’ de Rodrigo Cuevas. La montonera xente de fuera d’Asturies que veo perrear con un ritmu y lletra n’asturianu, ye dalgo que me llena munchísimo.
Como tolos qu’entamamos n’escueles de música tradicional, nun conciertu de fin de cursu de xuru que foi la primer vez. Pero la primera con un grupu, foi con Funeres. Yera un grupu que ficimos xente de Nava (taben Nel, Xurde, Villa, Luna, Fredo), tocamos nel festival de la sidra “teloneando” a Cuerria. Yo nun tenía ni tambor; nun se m’escaez la cara d’Andrés y Chis poniendo un micru a la caxa sorda pa tocar el ‘Mason’s Apron’. Nervios cero; yera pasalo bien y facer lo mesmo que facíemos toles tardes nel parque o nel Grandiella. El dempués, seis rapazos viendo como podíamos abrir les seis botelles de sidra (que fueron lo que cobramos) ensin abridor.
Como en toles profesiones (caún tien lo suyo) hai una montonera coses: precariedá llaboral, les hores na carretera, les hores de trabayu qu’hai detrás de cada nota, los horarios (que van meyorando, comparando con fai años), el poco reconocimentu que tien el trabayu de músicu dientro de la sociedá… y el poco reconocimientu que tien el percusionista dientro de la música jajajaja.
«La primer vez que toqué con un grupu, foi con Funeres. Tocamos nel festival de la sidra “teloneando” a Cuerria. Yo nun tenía ni tambor; nun se m’escaez la cara d’Andrés y Chis poniendo un micru a la caxa sorda pa tocar el ‘Mason’s Apron’. Cobramos seis botelles de sidra»
Lo primero de too, nun quiero selo. Creo mucho nel trabayu n’equipu, y la Cultura abarca munches disciplines que se m’escapen como músicu. Formaría un equipu qu’entendieren caúna de les rames. Salir de la oficina, sentir a los artistes y ver in situ cuála ye la situación real de los profesionales y amateurs, ver les maneres de cómo se-yos puede ayudar pa que puedan realizar esi trabayu d’una manera digna y regularizada. Creo que podría ser el puntu del que partiría.
Buff soi mui poco mitómanu y nun podría decir unu namás. Nun ye un instrumentu tradicional asturianu, pero’l bodhran yera l’instrumentu que más me llenaba de la qu’entamaba y munchos grupos que facíen música n’asturianu lu teníen: Puru, Viriu, Ruma, Pumarada, Antón… Marcáronme toos y ficiéronme trabayar pa intentar facelo como ellos.
«Nun ye un instrumentu tradicional asturianu, pero’l bodhran yera l’instrumentu que más me llenaba de la qu’entamaba y munchos grupos que facíen música n’asturianu lu teníen: Puru, Viriu, Ruma, Pumarada, Antón… Marcáronme toos y ficiéronme trabayar pa intentar facelo como ellos»
Nun escuendo nada de lo qu’escucho, y escucho de too. Depende de la xente cola que tea esi grupu podría ser unu o otru. Quiciabes por ser un estilu más “friki”, diría Ojete Calor o Ladilla Rusa; ye una de les bandes sonores que nos acompañen nes vacaciones/escapaes na furgoneta.
Repito que mitómanu cero y como ta claro qu’anque convide a un personaxe públicu nun va venir… Convidaría a toa esa xente que me falta pa poder charrar y compartir una última vez.
Nun voi dir de lo que nun soi; nun soi un gran lector. Y viendo que nun compuse nada nesti tiempu faedría d’esi trabayu un llabor duro. Nun ta n’asturianu, pero creo que Carboneras d’Aitana Castaño podría tar bien. Adaptar llibros que nos faigan ver d’onde venimos y que nos faen ser como somos a los asturianos, igual nos ayuda a nun volver a cometer los mesmos errores y nun llegar a perder tolo que lluchó y algamó la xente que vino enantes que nós.
Blima – Ayande/Tolena. Muncho me prestaba esti grupu, esti tema abría’l primer discu.
Felpeyu – Llevántate neña. Saquélu de la biblioteca y foi’l primer discu que sentí de música folk na mio vida. Esti tema tien dalgo que me marcó.
N’Arba – El cura ta malu. Nun perdíamos una Nueche Celta y en munches taba N’Arba. Esti tema siempre me prestó pola vida.
Rodrigo Cuevas – Xiringüelu. Nada que decir, lo que ta consiguiendo Rodri ye mui grande.
Tejedor – Gaites del infiernu. En munchos conciertos subimos a tocala con Tabladar. Yeren los comienzos y esti tema traime mui bonos recuerdos d’esos primeros años.
Corquiéu – Viquina. La lletra, la voz, el tema… Sentilu y nun te respigar ye imposible
Llan de Cubel – San Roque. Conseguimos una cinta de un directo de Llan de Cubel tocando creo que yera e República Checa; esti tema yera ponelu en bucle.
DRD – Tremoria. Ún de los grupos colos que más estudié. Al nun tener percusión permitíame meter al gusto tolos instrumentos colos qu’entamaba a xugar.
Dual – Los tres arbolinos. Un discazu con toles lletres.
Green – Day Scattered. La primer cinta orixinal que merqué coles mios perres. Munches vueltes cara A y cara B colos patines y nos viaxes en tren.
Screamin Headles Torsos – Free man. Recomendación del baxista Dani Jimenez (D.E.P). La llinia de baxu y batera parezme una obra d’arte. Recuerdo poner esti tema en bucle nel coche ida y vuelta a Uviéu.
Bagad Brieg – La Scottish infernale. Siempre fui de la Brieg, siempre fui de bagad mas que de pipe band. Los arreglos músicales de les bagads pasen penrriba de los cualquier otru tipo de banda, pa muestra un botón. 25 años…
Tchaikovsky IV – Movimiento de la sinfonía no.4. Fueron 10 años nel conservatoriu y eso un poco marca… Toqué esti tema unes cuantes veces colos platos na JOSPA; acababa coles pulsaciones a 200, tien muncha enerxía.
Vulfpeck – Animal spirits. Pa mi, ún de los meyores grupos de l’actualidá…
Flook – Eb reels. El descubrimientu de John Joe pa mi foi un enantes y un dempués. Sentía esti tema y nun paraba d’entrugame: ¿Cómo se pue facer esto col bodhran?
Michael Camilo – Dichotomy-Live at the blue note. Lo que me pasó con John Joe y el bodhran, pasóme con Horacio “El Megro” y la batería
Ojos de Brujo – Acción reacción y repercusión. Lo más cerca del flamenco que tuvi na mio vida, pero puedo asegurar que deprendí a tocar el caxón con Ojos de Brujo.
The olllam – With pure crystalll teeth. GRUPAZU, l’arreglu de la batera y la llimpieza cola que ta tocao, otra lliga…
Solas – The Big Reel of Ballynacally / The High Hill / Flash away the Pressing Gang. Fuimos Xurde, Nel y yo a comprar discos de Solas. Caún garró ún pa llueu facer copies pal restu. A mi tocóme esti y esta canción ye de les mios preferíes.
Suscríbite a les nuestres novedaes
