Les novedaes de la música n’asturianu yá lleguen hasta final d’añu y esti 2025 despídese con un tema a comuña ente’l cantador d’asturianada Odón del Paganéu y el productor d’electrónica de raigañu Fruela 757. Trátase de ‘Falando na faliella’, un cantar que yá ta en toles plataformes musicales y en YouTube, con una lletra que ye un poema de Fernán Coronas «Padre Galo» y que musicalmente bebe del drum&bass, dub, jungle y tonada.
«Yo siguía a Fruela 757 dende va tiempu pel YouTube. Tien muncho trabayu ehí, paecíame que lo facía perbién y entós tando yo mirando la mio canal, vi un videu de TPA nel que grabara esti tema fai un par d’años, vínome la inspiración, propuse-y facelo, paeció-y mui bien y ensiguida garró la idea«, comenta Odón del Paganéu sobre l’orixe d’una collaboración de la que Fruela 757 fala asina: «Pasóme’l cantar nel que taba pensando, comenté-y que me pidía dub y entamamos a compartir idees: percusiones afrobeat, partes ‘falaes’, cuernos, lluvia de meteoritos… Asina fui montando los arreglos».
«D’una estructura más o menos clara -samplers de batería, sub y sintes clásicos pa un primera parte drum&bass; dempués la parte dub; cambiu y subida pal final con tastu jungle-, pillaba coses de la tormenta de idees y diba poniéndoles según pidía la canción«, añade Javi Suárez -alter egu de Frula 757- al rodiu d’una composición que considera «una de les favorites» de la so trayectoria: «Siempre fui fan del vozarrón d’Odón –Orbeiru paezme un discazu- y tenía munches ganes de poder trabayar con él«, añade.
L’allegría pa col resultáu vien tamién per parte d’Odón del Paganéu: «Cuanto sentí la mezcla quedé ablucáu cola potencia que-y dio. Quedó perguapo», comenta’l cantador d’esti «Falando na faliella» que ve la lluz tamién nun formatu audiovisual que, como diz, «foi fácil facelo na tená del pueblu; ye cenciellu porque la potencia ye más la musical». Asina ye como estos dos artistes zarren l’añu anovando una vegada más l’asturianada y axuntándola a otres propuestes sonores.
Suscríbite a les nuestres novedaes
