Silvia Fernández (Uviéu, 1981) ye una de les guitarristes y baxistes con más sonadía de escena musical d’Asturies. Formó y forma parte de milenta proyectos ente los qu’hai grupos propios xunto cola so hermana, Gema Fernández (Delagua, GPS Project, Silvidos y Gemidos…); tocar con artistes de la música n’asturianu (Michael Lee Wolfe, Asturiana Mining Company, Anabel Santiago); o acompañar a otres formaciones d’Asturies (Girls To The Front, Pablo Senator…). Apocayá punxo voz a ‘Nun ye Delitu‘, el cantar coral en sofitu de les 6 de la Suiza.
Con ella siguimos cola estaya La Banda Sonora De…, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Bad de Michael Jackson… Pueo tar un tiempu ensin sentilu, pero siempre acabo volviendo a él porque me recuerda munchísimo a la mio adolescencia y, amás, musicalmente paezme un discu sublime.
¡Creo que yá nun me lo da pa meteme n’otru proyectu más! Pero tengo claro que cada grupu que formo o al que m’incorporo tien qu’aportame coses estremaes al restu. Prestaríame un grupu fusioneru con muncho groove y que faga mover la patuca y la cabecina, tipo Scary Pockets, Vulpeck o dalgo asina.
Pues con Delagua siguimos componiendo, anque nun se nos sienta muncho, asina que, a la fin, los preferíos siempre suelen ser los últimos que vas faciendo. Si tengo qu’escoyer de dalgún discu yá grabáu, diría ‘Bello Desastre’, una crítica a la dictadura de la belleza y la perfección, y una defensa de l’autenticidá, la diferencia y ser ún mesmu per enriba de tolos estereotipos sociales.
«De los cantares que fici escoyería ‘Bello Desastre’, una crítica a la dictadura de la belleza y la perfección, y una defensa de l’autenticidá, la diferencia y ser ún mesmu per enriba de tolos estereotipos sociales»
Tenía nueve años y la mio hermana, ocho. Daquella componíemos canciones y teníemos grabao una maqueta pequeña que foi rulando ente la xente del pueblu onde veraneábemos, Bual. Consiguiéronnos un conciertu na discoteca del pueblu y recuérdolo peremocionante. La xente cantaba los nuesos cantares; ¡toos amigos y familia, evidentemente! Foi una pasada, pero tamién alcuérdome de baxar como si nun tuviere pasao nada. Nel fondu la música siempre foi una parte más de la mio y nuestra vida, y tomábemoslo como un xuegu. Quién diba dicinos que munchos años dempués díbemos dedicanos a esto…
Lo más inxusto de ser artista -falo de los y les artistes que, como yo, nun tenemos fama nin manexamos cifres astronómiques pola venta de los nuestros productos- ye la dificultá, cada vez mayor, de poder desendolcar la to profesión con dignidá, n’espacios afayadizos pa ello y con unos ingresos seguros que te permitan poder siguir apostando polo que faes. Munches veces, l’artista tien que diversificase y enfocar el so tiempu y esfuerciu n’otros campos llaborales que-y ofrezan un sueldu col que complementar los ingresos qu’algama del so arte.
Centraríame na Llei de Mecenazgu pa qu’en términos de fiscalidá España s’equipare a los estándares europeos pa favorecer la inversión cultural. Colocar la cultura nel centru, que dexe de vese como un asuntu menor que tratar o como daqué ornamental namás. Llucharía por un IVA cultural al nivel de países como Francia, que ronda’l 4%. Un IVA reducío ye tamién una manera construyir un país.
Per enriba de too, pondría atención especial a la música en directu, que nun ye namás un motor económicu sinón un xenerador de riqueza pa tola sociedá. Dexaría de criminalizar la música en vivo y facilitaría espacios pal so desarrollu. De la mesma manera, atendería aquellos pilancos llegales ensin resolver qu’obliguen a munchos artistes a vivir nuna illegalidá non escoyida. Les sales de conciertos y bares de música en directo han tener el mesmu reconocimientu cultural que los grandes equipamientos. La música popular ye tan importante como la clásica o la lírica.
Pa finar, acabar de redactar por fin l’Estatutu del Artista pa dignificar la situación profesional de los y les trabayadores del sector cultural.
«Nun foi hasta que conocí a Michael Lee Wolfe qu’entamé a tocar con Anabel Santiago y, más tarde, con Asturiana Mining Company, y entamé a introducime na música asturiana»
Mio pá tenía un grupu de blues cuando neña y díbemos a velu a conciertos; de fechu, xubíanos tamién a tocar con él y siempre tuvi mui cómoda nesi mediu. Nun foi hasta que conocí a Michael Lee Wolfe qu’entamé a tocar con Anabel Santiago y, más tarde, con Asturiana Mining Company, y entamé a introducime na música asturiana. Una esperiencia perguapa.
«Ernesto Sevilla sería la única persona que, anque me dixera que’l conciertu-y paeciera una mierda, fadríame una gracia increyible»
Un tema que m’anima muncho cuando toi un poco baxa de moral ye ¡’Santa Sofía’ de Chayanne! O Juan Luis Guerra, pero esi nun m’avergoña dicilo.
A Ernesto Sevilla, porque sería la única persona que, anque me dixera que’l conciertu-y paeciera una mierda, fadríame una gracia increyible.
Almito que nun toi mui puesta en lliteratura asturiana, asina que voi barrer pa casa y dicir el últimu llibru de la mio hermana, Germma Fernández, Es medianoche en casi todo el cuerpo. Amás, aprovecho pa dicir que tenemos un espectáculu al rodiu’l llibru nel que combinamos música, lliteratura y humor nuna apuesta nel que’l testu nun ta lleíu, sinón teatralizáu. Música y pallabra fúndense nun solu ente, siendo difícil estremar ónde entama la una y fina la otra. P’algamar representar esti carrusel emocional que ye la vida tamién introducimos humor pa que l’espectador pase de la risa al lloru, a la emoción ensin entender mui bien lo que-y ta pasando.
Suscríbite a les nuestres novedaes
