En mayu de 2024 publicóse en formatu físicu el quintu trabayu de la Fontoria: El neñu que cuntó toles estrelles. La banda piloñesa de folk progresivu llanza agora en toles plataformes musicales los siete temes que dan forma a un trabayu que como diz Maxi Areñes, cabezaleru de la formación, «ta estráu de pingarates autobiográfiques que van dende los años de neñu y mozu, hasta güei» y nel que suenen más de venti instrumentos estremaos.
«Ye un trabayu conceptual que fala d’un neñín que ta postráu nuna cama y que cunta estrelles dende’l ventanu del so cuartu pa distrayese. A midida que va medrando, el neñu tien la idega de que la xente, la sociedá, son xirasoles que, uniformaos, van toos al mesmu sen, adorando al sol y faciendo toos lo mesmo. Él nun quier ser como ellos, asina que decide qu’enxamás va ser un xirasol; sedrá un «Xiralluna«…», desplica Areñes pa falar del conceptu que ta detrás de los siete temes del álbum.
Como ye vezu nos sos trabayos, la banda piloñesa arródiase d’una montonera collaboraciones: Vero Rubio (trompeta y trompa), Josep-María Ribelles (Harpa), Mael Martínez (Bodhran), Olivier Grenoble (Flauta) y Maximín Martínez (Narración). Amás, Maxi Areñes encárgase de la voz, guitarres clásiques, acústiques y llétriques, baxos acústicu y llétricu, lap Steel, gaita rabil, xiblates, bombarda, pianu, harmoniu, electrorgan transpositor, órganos farfisa y lowrey, sintetizaores prop.
Suscríbite a les nuestres novedaes
