La Banda Sonora d’Eva Tejedor
Eva Tejedor ye una de les pandereteres y cantantes más renomaes de la música asturiana. Entamó la so trayectoria dende mui neña nel grupu Tejedor xunto a los sos hermanos Jose Manuel y Javi. Con ellos grabó tres discos, ganó tres premios AMAS y otra montonera reconocimientos, y tocó per una montonera de países. En 2015 graba’l so primer discu en solitario, Ramos en Peñamellera baja, y en 2019 llanza’l so primer trabayu xunto a Les Pandereteres, L’Entamu. Con cuasi 30 años de trabayu constante, ye un referente nel mundu de la pandereta y una correa de tresmisión ente les pandereteres históriques y les xeneraciones de nueves pandereteres que tán aportando.
Con ella siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Sienti la playlist La Banda Sonora d’Eva Tejedor
Un discu qu’enxamás canses de sentir.
Básico 2 de Revolver.
Si tuvieres que formar parte d’otru proyectu musical, ¿cuál sería?
Una banda de pop-rock.
De los cantares que compusisti o interpretes, ¿cuál ye’l to preferíu?
Setiembre. Ye mui especial, porque foi la mi primer composición y taba con mio ma… foi la primer persona en sentir esi cantar, pero nunca pudo disfrutalo en directo…
«Lo peor de ser artista ye’l sacrificiu a nivel personal de momentos a los que tienes qu’arrenunciar»
¿Cuándo foi la primer vez que xubisti a un escenariu y que pasó enantes, durante y depués?
Yera tan pequeña que nun m’alcuerdo… pero la primer vegada que xubí a un escenariu profesionalmente falando foi’l 25 d’agostu de 1995 n’Avilés. Enantes sentí nervios, durante’l conciertu sentí emoción y ¿dempués? Pues nesi momentu supi que ser panderetera yera la profesión a la que dedicar el resto la mio vida.
¿Qué ye lo más inxusto de ser artista?
Dedicarte a la música supón un riesgu mui grande. Conlleva muncho trabayu, autoesixencia y incertidume. Lo peor ye’l sacrificiu a nivel personal de momentos a los que tienes qu’arrenunciar.
Si fueres Conseyera de Cultura, ¿qué son les primeres coses que fadríes?
Pues pensaba soltar una buena parrafada, pero voi resumilo: escuchar.
«Con Jose Manuel y Javi Tejedor tuvi la suerte de tener los meyores mayestros en casa, que dende bien neña tresmitiéronme l’amor y el respetu pola música asturiana»
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
Jose Manuel y Javi Tejedor. Tuvi la suerte de tener los meyores mayestros en casa, que dende bien neña tresmitiéronme l’amor y el respetu pola música asturiana.
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
Sergio Dalma … jajaja
¿A qué personaxe públicu convidaríes a un conciertu tuyu, a pasar llueu pel backstage y pa qué?
A Phil Cunningham. Admírolu fonderamente. Tuvi la suerte de conocelo va cuasi 25 años y lo que se pue deprender con esti xeniu nunes hores ye incuntable. Phil ye música, ye maxa…
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
La familia Castañón d’Ígor Medio
