“Arrímate a la fesoria” del Grupu Folclóricu Blimea yá ta nes plataformes musicales
Yá ta en Spotify y nes demás platafomes dixitales de música Arrímate a la fesoria. Esti ye’l primer y únicu trabayu discográficu hasta la fecha del Grupu Folclóricu Blimea, fechu col motivu del so 50 aniversariu nel añu 2008. L’ánimu fundamental d’esta agrupación ye caltener vezos y tradiciones, siendo de les poques agrupaciones qu’entá conserva bailles de la nomada Sección Femenina. Dalgunos exemplos d’estos bailles son la versión midida en fileres de los tres bailles de gaita y tambor del centru d’Asturies: Lo suelto, lo Lixero y la Muñeira, o otros bailles tamién con una coreografía mui marcada como’l Ringo Rango.
El Grupu Folclóricu Blimea nes sos actuaciones entemez estos bailles con otros de caráuter más llibre y procedentes de diferentes llugares de la xeografía asturiana: La Media Vuelta, la Xota Caldueñu o la Xota Blimea, tamién conocida como La Fesoria, que ye la que da títulu al álbum col so primer versu “Arrímate a la fesoria”. Amás, tamién inclúi el soníu de varios instrumentos aparte de la gaita, el tambor y les panderetes, como la botonera, la xiblata, la bandurria o’l bombu, y una bona coleción de cantares de pandereta.
“Lo que se recueye n’esti discu, “Arrímate a la Fesoria” ye una pequeña muestra de toa esa variedá de repertoriu qu’esperamos qu’al oyente-y preste”, comenten demde l’agrupación de la cuenca’l Nalón.
