La Banda Sonora d’Ún de Grao

José Martínez ye un guitarrista y cantante que lleva una montonera d’años tocando en grupos folk y en 2016 entamó la so carrera en solitario col nome artísticu d’Ún de Grao. Nesti proyectu reinterpreta pieces de tonada y d’otres músiques de raigañu asturianu pa empobinales hacia soníos propios del rock, del jazz o de la bossa nova.

Con él siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Sienti la playlist La Banda Sonora d’Ún de Grao

Un discu qu’enxamás canses de sentir.

“Head Hunters”, de Herbie Hancock por dicir ún, pero hai munchísimos discos que taría poniendo tol día con munchu gustu.

Si tuvieres que formar parte d’otru proyectu musical, ¿cuál sería?

Dalgún que tuviera abondo de xente que cantare bien pa facer bonos coros, instrumentistes perbonos, dalgún bon lletrista, bones armoníes, ritmu sabrosón, compromisu políticu, bon representante que tratare munchos bolos en mui bones condiciones, ya que nun fixera falta metese fartures de conducir. Si sabes de dalgún grupu asina, has d’avisame pa manda-yos el C.V. Nun me paez que me fueran almitir, pero por probar…

De los cantares que compusisti o interpretes, ¿cuál ye’l to preferíu?

Faes unes entrugues mui complicaes de contestar. Voi dicir “Viva Grau”, pero más pola armonía que pol propiu cantar; lo que ye’l cantar, la “Texeora de Bayo” ye de les pieces que más me presten.

«Tocaba nun grupu con inspiración heavy, pero que na realidá nun pasaba d’un trash metal básicu bastante machacón»

¿Cuándo foi la primer vez que xubisti a un escenariu y que pasó enantes, durante y depués?

Añu 96, faltábame pocu pa cumplir los 18, nun sabría especificar la fecha, yo diría qu’en primavera. Foi nun chigre de Grau, nun m’alcuerdo del nome, pudiera ser el Búho o daqué nome de páxaru nocherniegu, taba na cai Cimavilla. Yo tocaba nun grupu con inspiración heavy, pero que na realidá nun pasaba d’un trash metal básicu bastante machacón que se llamaba “Carneiro Puñetero”. Téngolo pasao munchu bien con esa xente. 

Nun tengo alcordanza de lo que pasó anantes, pero durante sí que m’alcuerdo de pasalo teta, ya caer na cuenta de qu’aquello prestábame pola vida. Dempués, supongo que pañaríamos un bon fogonazu, que daquella tenía bastante afición.

¿Qué ye lo más inxusto de ser artista?

Nesti país hai abondo d’inxusticies pa colos músicos que podíen resumise en que nun se respeta al músicu como profesional, nin a la propia música como la parte importante que debería ser d’una sociedá sana.

Si fueres Conseyeru de Cultura, ¿qué son les primeres coses que fadríes?

Intentar atopar un puntu d’alcuentru ente’l mundu de la burocracia, llegalidá, alministración ya demás barreres, ya’l mundu del artista que ta entamando y nun topa más que problemes pa ganase la vida. 

«Taría bien poner banda sonora al poemariu “El sistema débeme una chocolatina” de Pablo X. Suárez»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Supongo que Tuenda fueron de los que más. 

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Nun me paez que faiga tala cosa; nun sé si cuenta que l’otru día tuve sintiendo dalgún discu de Georgie Dann, pero foi como homenaxe pola so muerte. 

¿A qué personaxe públicu convidaríes a un conciertu tuyu, a pasar llueu pel backstage y pa qué?

Al Amancio Ortega, pa ver si convida a un par de rondes. Ya sabes que lo de cantar toná da muncha sede. 

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Taría bien el poemariu “El sistema débeme una chocolatina” de Pablo X. Suárez, que amás de bon poeta, ye bon collaciu. 

Mercar los discos d’Ún de Grao na tienda online

Dexa un comentariu

X