Esti domingu 18 de xunu arranca la quinta edición d’Amosando, el ciclu de presentaciones de discos de música asturiana, con conciertos en formatu íntimu grabaos y emitíos llueu per Internet. La Bonturné y La Garrapiella protagonicen el primer conciertu/grabación nel que van presentar los sos trabayos asoleyaos apocayá: A Contraforga y Esmesando. La música popular asturiana pal baille, reellaborada y arriquecida con una instrumentación poco habitual nesti tipu de bandes, dan forma a los cantares qu’interpreten estos dos proyectos. L’escenariu va volver a ser Les Naves d’El Natahoyo; y namás van tener invitación a ellos la xente asociao a L’Ensame que pida per corréu electrónicu una de les 10 entraes dobles disponibles.
La Bonturné ye’l nuevu proyectu bal-folk de trés de los músicos más renomaos del folk asturianu -David Varela, Santi Caleya y Merce Santos- xunto a David Casillas. N’A Contraforga axunten temes de tastu popular iguaos pal baille.
La Garrapiella ye una bandina qu’apuesta por renovar la propuesta musical y estética d’esti tipu de formaciones tradicionales y asina afondar en soníos más actuales. Esmesando ye’l so primer discu y el reflexu de too esto.
Cinco ediciones y 22 artistes
Amosando nació en marzu de 2019 a idea de la plataforma musicasturiana.com. Nesti tiempu tocaron 22 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel, Algaire, Mostru L’Horru y Slum Suit La suma de los videos de los conciertos algama más de 200.000 reproducciones en YouTube.
Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje y Rubén Álvarez y subvencionada pola Fundación Municipal de Cultura y Educación de Gijón/Xixón y la Conseyería de Cultura, Política Llingüística y Turismu del Principáu d’Asturies..
Suscríbite a les nuestres novedaes
