Tres la exitosa campaña de crowdfunding yá hai fecha de llanzamientu oficial pa los dos nuevos trabayos de Mapi Quintana. El vienres 30 de xunu van tar disponibles en toles plataformes musicales y a la venta na tienda de musicasturiana.com La Maramoniz y Música pa tornar páxaros. L’artista l.leniza ta estos díes rematando la entrega de les recompenses del crowdfunding pa dar a quien la sofitó la esclusividá de ser les primeres persones que tastien les nueves canciones que publica dempués de 9 años. Amás, esti sábadu 17 de xunu a les 20h Teatru Vital Aza de La Pola (L.lena), va presentar en directo La Maramoniz tres facer la selmana pasada nel Niemeyer d’Avilés la presentación de Música pa tornar páxaros.
La Maramoniz ye’l proyectu musical nuevu que Mapi Quintana tien xunto César Latorre, Juanjo Díaz y Sonia Cartón y del que yá ta disponible el single «Agarráu de La Maramoniz«. «La materia prima d’estos temes son los cantares que-y sentí a mio güela y qu’ella deprendió n’aldea de La Maramoniz. Tamién hai cantares de composición propia y nellos entemezo la influencia de la tradición asturiana nes melodíes y nes temátiques xunto a estétiques más vanguardistes nos arreglos», cunta l’artista.
Per otru llau Música pa tornar páxaros ta formáu pol repertoriu compuestu pal espectáculu que-y encargó’l gobiernu asturianu pa representar a Asturies na 51 edición del Festival Intercélticu de Lorient. D’esti álbum yá se pue sentir l’adelantu «La Carta«. «Ta dedicada al mio compañeru musical fallecíu en 2019, Elías García y a tola xente que nos dexó nestos últimos años, y musicalmente ta influyía pol jazz, la improvisación, la música impresionista y la música tradicional asturiana», desplica Mapi Quintana.
Formatu especial
Amás de la calidá de la música, estos dos trabayos destaquen porque entren pelos güeyos. Música pa tornar páxaros tien un formatu únicu y orixinal, con un CD que va dientro d’una caxa de cartón artesanal, que tien dellos elementos decorativos y qu’inclúi una postal por cada cantar, fecha con munchu procuru pola diseñadora gráfica d’esti proyectu, l’artista catalana Marina Durany. Ye una pieza de coleccionista qu’engalana tol conceptu d’esta obra tan destacada. Per otru llau, La Maramoniz tamién asoleya nun formatu cartón ensin usu de plásticu -por aquello de la sostenibilidá-, con un llibretu en formatu póster. L’autora de tola gráfica d’esti otru discu ye Leticia Baselgas, ilustradora y diseñadora amás de cantante y panderetera en L-R y Calea.
Suscríbite a les nuestres novedaes
