La cantante Isabel Ventura axunta nun discu jazz y llingua mirandesa
La vocalista portuguesa Isabel Ventura ta acabante d’asoleyar un trabayu discográficu tituláu Nun me lhembra de squecer nel que combina’l jazz col mirandés, idioma hermanu del asturianu, que ye oficial dende l’añu 1999. Con nueve cortes incluyíos nel álbum esta intérprete afonda nel so estilu de jazz clásicu, qu’entemez con poemes d’escritores reconocíos de la llingua mirandesa, especialmente Amadeu Ferreira, ún de los sos grandes defensores. La promoción del discu inclúi tamién un videu-clip col cantar «L camino de casa», grabáu en dellos llugares del país mirandés. Ta acompañada instrumentalmente por Marco Figueiredo (pianu, composición y arreglos), João Paulo Rosado (contrabaxu) y Filipe Monteiro (batería).
Nacida na ciudá de Braganza, pasó la so infancia nuna aldea de la Terra de Miranda llamada Campo de Víboras, na que se fala mirandés, una llingua qu’ella considera «mui familiar». Cuenta que retenía vocabulariu y que fixo un cursu na Associaçon de Lhéngua i Cultura Mirandesa pa deprender la gramática y la llingua de forma estructurada, buscando un mayor perfeccionamientu nel so emplegu. Ella mesma esplica que Nun me lhembro de squecer ye un discu que «representa los mios raigaños, fui a buscar les mios memories de neña, de la infancia, de l’adolescencia, y ye un alcuentru únicu… existe’l mirandés na música tradicional, pero nel jazz non y prestóme muncho facer esti trabayu. Tamién tengo la responsabilidá de preservar esta llingua, que si nun se fala nin se canta va perdese»; nesti sen, reconoz que foi tou un desafiu personal inxertar el mirandés nel jazz.
30 años de carrera
Isabel Ventura escomenzó la so actividá musical na década de los 80, collaborando con bandes de renome como Trabalhadores do Comercio o GNR, dos de les formaciones de pop-rock más conocíes de Portugal. El so interés por cantantes como Billie Holiday, Sarah Vaughan o Dianne Reeves y músicos como Chet Baker, Keith Jarrett o Miles Davis, atráyenla pal jazz. Principia a participar davezu en jam-sessions y en conciertos con músicos de la escena jazz portuguesa, hasta que decide formar el so propiu cuartetu, actuando dende entós en munchos festivales y eventos venceyaos al jazz per tola xeografía lusa. Nel añu 2013 publica’l so primer trabayu en solitario, tituláu Encontro en dois momentos, y dos años depués diba grabar un discu en directo de nome To jazz.
