Acaba la segunda temporada del programa ‘Al son’
El próximu llunes 27 termina la segunda temporada del programa Al Son, emitíu dende hai un añu y mediu al traviés de les ondes de Radio del Principáu d’Asturies (RPA). Esti espaciu escomenzaba na emisora pública’l 2 de febreru del 2021 y dende entós, ininterrumpidamente, vieno emitiéndose hasta anguaño, sumando los capítulos correspondientes a esti añu 2022.
En total foron setenta les entregues del únicu programa dedicáu esclusivamente a la música d’espresión asturiana na RPA; capítulos que trataron munchos aspectos relativos a ella, como por exemplu: pioneros de la música asturiana, l’asturianada contemporánea, nuevu canciu astur, la mina na música asturiana, pop llariegu, celtismu, les bandines tradicionales, folk de cámara, jazz de raigañu, rock n’asturianu, la revolución de la pandereta, cantares de sidra, movimientu coral o vanguardies. Ente tolos capítulos formen una de les mayores enciclopedies sonores sobre la música asturiana qu’esiste na actualidá, col aquello de que ta puesta a disposición de tol públicu interesáu al traviés de la estaya ‘RPA a la carta‘.
Dirixíu y presentáu pol músicu y director del Anuariu de la Música Asturiana, Xune Elipe, el programa contó na so primer temporada cola collaboración del periodista Xicu Ariza (musicasturiana.com) y la llocutora Lena Elipe. Nél diose tamién cuenta de toles novedaes discográfiques que se producieron nel últimu añu y mediu, pasando pelos sos micros bona parte de la escena musical del país.
Redifusiones y temporaes
N’acabando la segunda temporada ta previsto que se faigan redifusiones de dellos capítulos a lo llargo del branu. La intención de la productora responsable del programa, Goxe Producciones, ye qu’a la vuelta pueda retomase la emisón de temporaes nueves. La idea ye qu’Al Son tea sollerte fundamentalmente a l’actualidá de la música asturiana, informando de les novedaes que vayan editándose y de tola actividá que xenere (conciertos, alcuentros, publicaciones…), amás d’incorporar secciones nueves.
