Samartín de Lluiña, el pueblu de Cuideiru que presume de raigaños vaqueiros, vuelve per vegada a celebrar el Mercáu Vaqueiru. Va ser esti primer fin de selmana d’agostu, los díes 2 y 3, cuando’l pueblu vuelva sobre los sos raigaños, presentes na mayoría de los vecinos. Mientres dos díes, Samartín va esfrutar de la cultura vaqueira y asturiana con delles actividaes -rutes, charres, taller de títeres, xuegos tradicionales, mercáu…- ente les que la música n’asturianu va tar bien presente.
Na XXIII edición d’esta fiesta considerada d‘Interés Turísticu d’Asturies va actuar el cuartetu de música folk, indie, pop y canción d’autor La Ciudá nel Mar. El so conciertu va ser el sábadu 2 a les 20h. Na tarde de la xornada del domingu 3 hai tamién tiempu pal baille y la música tradicional coles actuaciones del grupu de baille de Cuideiru, Arduriu Pixuatu, a les 17 hores y a les 20 hores de les Pandereteras de Somiedo. Amás, mientres tol mercáu, va haber exhibición de gües, artesanos… y chigre al cargu de la comisión de fiestes, organizadora del certame.
Suscríbite a les nuestres novedaes
