El festival de música moza n’asturianu que creó en 2023 Musicasturiana.com va celebrar la so cuarta edición en 2026. La cita va ser el sábadu 7 de febreru na sala Lata de Zinc d’Uviéu y nella van volver a participar cuatro proyectos d’estremaos estilos musicales cola característica en común de que la mayoría de los sos componentes son menores de 35 años. Amás, esti añu hai novedades na so coordinación.
Acordies a la filosofía del eventu, tola xente implicao nesti eventu tien de tener menos de 35 años. Ello ye, que’l que fuera’l so creador y director Xicu Ariza -responsable de Musicasturiana.com y Ixuxú Cultura-, dexa la dirección del festival pa fomentar el relevu xeneracional nesti sen. D’esta manera, el Semando Fest va tar organizáu na próxima edición por Yedra Riesgo y Raúl Alonso del proyectu comunicativu Héroes Ensin Nome, que yá fixeren llabores de producción y de presentación del festival dende la so primer edición.
El Semando Fest agotó entraes en toles ediciones entamaes, nagua por ser más qu’un conciertu y por eso tien una filosofía caracterizada por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’una actuación; por reivindicar les sales de conciertos como un espaciu afayadizu pal exposigue de la música de raigañu; y por apuesta por da-y oportunidaes a les y los creadores xóvenes.
La iniciativa nació en 2023 y nesa edición participaron el dúu d’asturianada Alicia Villanueva y Luis Álvarez Pola; el tríu de folk de cámara Loína; les pandereteres Algaire y el dúu d’electrónica de raigañu Llevólu’l Sumiciu. Cecilia Díaz foi l’autora del cartelu y la identidá visual, mientres que les semeyes y el videu resume del eventu fueron obra de Lucía Garó.
En 2024 xubieron al escenariu Sandra Álvarez y Noemí González col so espectáculu de poesía feminista y tonada -qu’anguaño preséntase como Milfueyes-; Mostru l’Horru col so rap combativu; la banda de folk celta Guieldu y el grupu de punk-rock Ochobre. Beatriz Menéndez -alter ego de Made in Chigre– foi la responsable de tola parte gráfica y Leticia Cernuda de les semeyes y del videu.
La edición de 2025 duró dos díes: el primeru d’ellos celebróse la Semando Folk Session na que más de quince instrumentistes tocaron, cantaron y baillaron repertoriu asturianu per más de tres hores nel chigre L’Esperteyu; mentes que nel segundu día tocaron en Lata de Zinc les pandereteres Abéu; l’artista multidisciplinar Ferla Megía; el grupu de power folk Alienda y la banda post-rock Melandru. Paula Suárez Surimi foi quien desendolcó tola identidá visual y Nay Semeya la responsable de rexistrar audiovisualmente’l festival.
Suscríbite a les nuestres novedaes
