L’asociación de folclore La Flor de Grau organiza pal próximu sábadu 29 de payares ente les 16h y les 19h un filandón en La Panera de Grau. Con esta actividá gratuita quieren reivindicar estes reuniones tradicionales «onde la xente xuntábase pa texer, filar o bordar mentanto compartía histories, cantares y bailles» y por ello conviden a participar pa «crear, deprender y compartir» trayendo’l «so llabor de casa» o «cenciellamente averándose pa disfrutar del ambiente» nesti alcuentru pa «revivir esta tradición».
«El filandón yera un espaciu comunitariu enllenu de vida, creatividá y memoria… ¡y queremos recuperalo!», añanden dende La Flor de Grau. Amás, el colectivu anuncia que s’unió a la rede de filandones impulsada pola Asociación para la Creación Textil, «una entidá d’ámbitu estatal que busca promover la creación textil y na qu’un filandón asturianu encaxa la perfección». Nesta actividá tamién va collaborar l’artesana textil de Las Regueras Paz Mesa.
«Proponemos retomar una actividá mui enraigonada nel nuestru folclor y amosar que reuniones d’esti calter tienen tola vixencia nos nuestros díes; podemos texer una media, bordar un pañuelu, lleer un poema o echar un cantar«, conclúin dende La Flor de Grau.
Suscríbite a les nuestres novedaes
