Yá asoleyó “Tiempu de sidra y roses”, el cantar nuevu de La Tarrancha a ritmu de punk-folk y reivindicación
Yá ta en toles plataformes dixitales el cantar nuevu de La Tarrancha. “Tiempu de sidra y roses” ye, dempués de “Llara echó moza” -publicáu nel compilatoriu d’Engarradiella-, y “¡Vaya sociedá!” -qu’apaez nel discu “El mio cantar”-, la tercer canción nueva que’l grupu de mecigayu-ska asoleya dende qu’en 2018 llanzaron el so últimu CD ‘Baillando con Llokes”.
Musicalmente «ye un tema baillable, pegadizu, con fuercia y contundencia y con un estribillu bastante pegañosu», comenta Delfín Valdés, vocalista de La Tarrancha. El ritmu márcalu un punk-folk xenéricu «ensin nenguna procedencia nin pretensión local en cuantes a les raíces d’esi folk» -esclaria Valdés- y nél destaquen l’acurdión, la incorporación de xiblates y la mandolina que mete Nico Braña de Vodoo Grass, al que llamaron pa collaborar con un resultáu «bien guapu».
Los tiempos pelos que tamos pasando van tar mui presentes nuna lletra que’l vocalista de La Tarrancha califica de «murnia, cruda anque tamién con una miguina d’esperanza». «Trata de qu’esti mundu va a la sinrazón, vamos cuesta abaxo ensin frenos y hai que volver a poner los pies na tierra y recuerda que los tiempos pasaos son tiempos pasaos, pero hubo dalgún momentín pequeñu de la historia nos qu’hubo díes de sidra y roses y hai que recuperar esos díes d’una mayor conciencia social de la que tenemos agora».
Xira y llanzamientos
La publicación de “Tiempu de sidra y roses” sirve pa calentar la primer fecha de la xira nueva del grupu, la del 8 d’abril nel Festival Internacional de la Cerveza de Llangréu (FICAL) y a la que van siguir otres confirmaes nel Sol Celta d’Avilés -6 de mayu-, en Vil.lablino -20 de mayu-, nel Maizu Rock d’Intriagu -2 de xunetu-, n’El Puntal de Villaviciosa -9 xunetu-, na llocalidá lucense de Barreiros -23 de xunetu-, en Torrelavega -20 d’agostu-, y na Noite Celta de Porcía del 27 d’agostu.
En rellación a los sos próximos pasos de calter discográficu, Delfín Valdés desplica qu’«hai dalguna cosa nueva, pero tanto como pa un discu non. Entós la filosofía va ser dir grabando temes sueltos, intentar faer videos y dir soltándolos». En cuantes a los tiempos, sorraya que nun se marquen plazos: «Simplemente vamos dir faciendo, que cada llanzamientu lu marque la vida personal, los conciertos que tengamos… esa va ser la filosofía; vivir la vida y la música ensin tener que marcanos feches».
