El 29 de payares del 2025 estrenóse nel festival Artístiques la 1er Muestra d’Asturianada Electrónica, una actuación creada a costafecha pa esti eventu entamáu por Puru Remangu y Ixuxú Cultura qu’axuntó la voz de les cantadores Alicia Villanueva y Lucía Rojo, les producciones de Llevólu’l Sumiciu y Fruela 757 y les lletres de Marina Pangua, Blanca Fernández y Ánxela d’Ávila. El próximu 10 d’ochobre va volver a representase en directo dientro de la Fiesta Jabata, un eventu qu’organiza l‘Instituto Nacional de la Juventud (INJUVE) en Madrid.
Jabata ye «la primer folixa qu’INJUVE dedica a la creación musical emerxente, dando a conocer dalgunos proyectos beneficiarios de les Ayudas Injuve pa la Creación Joven«, despliquen dende esti organismu dependiente del Ministeriu de Xuventú y Infancia. D’esta manera, l’espaciu Infinito Delicias de Madrid va acoyer dende les 17h y con entrada llibre un mercadín de cómic y los conciertos d’Ede, Anouck the Band amás de la Muestra d’Asturianada Electrónica d’Artístiques.
L’actuación de les artistes asturianes ta programada pa les 19h y nella van participar les cantadores Alicia Villanueva y Lucía Rojo, amás de Llevólu’l Sumiciu, que s’encarguen de pinchar los temes producíos por ellos y por Fruela 757, amás d’acompañar el conciertu con proyecciones audiovisuales. Tamién van intervenir Xicu Ariza y Enar Areces d’Ixuxú Cultura, Musicasturiana.com y Puru Remangu, que van falar al rodiu del proyectu d’Artístiques y d’esta muestra d’asturianada electrónica.
Coles seis pieces que dan forma a esta actuación la tonada actualízase a la época actual gracies a amestase con música electrónica y a tener unes lletres de temática actual que traten cuestiones como les problemátiques de la mocedá, el feminismu y la diversidá llingüística y cultural.
Suscríbite a les nuestres novedaes
