El pasáu mes de febreru presentóse Taragañu, una banda punk formada por componentes procedentes de grupos como Desaniciu, Sin Emu, Tygers of Wrath o Bristol Bulldogs. Tres de dar yá dellos conciertos, la formación llanza agora’l so primer tema n’asturianu ‘L’últimu bar’, single adelantu de la demo que van asoleyar esti vienres y que ta formada por ocho temes.
«Ye’l primer cantar que ficimos y fala de topase en chigre, echar tiempu colos collacios, sentir música a comuña y sobre manera reise. Compartir tiempu, contanos les penes y llueu reinos d’elles ye una cura pal alma nesta mierda no material y antisocial no social na que mos tocó vivir», despliquen dende Taragañu al rodiu d’esti single que ve la lluz acompañáu d’un videoclip.
El tema grabóse de forma casera na Cueva del Oi! -la casa de Rafa, baxista de la formación- y ye una de les ocho canciones que formen la maqueta que llancen esti vienres. ‘Tocará vencer’ foi’l primer adelantu qu’asoleyaron hai trés selmanes, un tema en castellanu que, como define’l grupu, ye «un himnu a la rebeldía, a la resistencia y a la necesidá de lluchar siempre pesie a too y toos».
«La idea ye facer más cantares y llueu grabar n’estudiu los que más nos presten pa ver si somos a editalos. Tamos dando-y vueltes a ver si podemos sacar dalgo físico, pero pel momentu la demo va quedar namás en dixital; vamos xubila a Bandcamp y a partir del vienres va poder descargase y a quien-y preste tamién va poder solmenar unos euros pa la causa«, añade’l grupu al rodiu les sos intenciones de grabación dexando claro que, como entamaron a tocar a primeros d’añu, queríen yá «tener una maqueta pa dar una idega» de la so propuesta.
La próxima parada en directo de Taragañu va ser esti vienres 14 d’agostu na sala Gong d’Uviéu, onde van telonear a la banda mexicana Mess, que ta de xira con cinco feches nel Estáu español. «Tenemos en mente facer daqué en La Traviesa en L’Infiestu y nel Bola 8 de Xixón», añade’l grupu, anque entá nun tienen «nada zarrao». Mentanto, la banda punk sigue faciendo’l so camín, col qu’aseguren que tán «contentos» y col que se reafirmen na so filosofía: «entendemos la música como una parte tamién de llucha y nello tamos. Como decía El Ronko nos milicianos ‘el que ye auténticu nun grita; actúa’.
Suscríbite a les nuestres novedaes
