La música del pabellón d’Asturies na Espo’92
Nel pabellón d’Asturies de la Espo’92 tuvo sonando música asturiana compuesta por Fernando Largo (Beleño) y interpretada por renomaos músicos del país. Dende l’AMCA (Archivu de la Música Contemporánea Asturiana) dixitalizamos la casete Asturias ’92 que recueye estes composiciones y de la que s’editaron mui poques copies con una distribución non comercial.
Nel añu 1992 l’Estáu español acoyía la celebración d’una Esposición Universal na capital andaluza, Sevilla. El Gobiernu Asturianu participaba nella con un pabellón col que promocionar y dar a conocer el nuestru país. La instalación contó con un programa d’actividaes numberosu y variáu. Nel aspectu espositivu centrábase fundamentalmente na naturaleza y el paisaxe asturianu, col agua como ún de los elementos cimeros. Y rellacionaos con ello la mar, que nos comunica y xune cola Europa atlántica, cola que compartimos rasgos comunes.
Con esta filosofía encaróse tamién la música que diba sonar nel pabellón, un aspectu al que se-y dio una importancia non menor nel conxuntu global que se quería ufiertar. El Comisariu de la Espo’92 n’Asturies, Eduardo Méndez Riestra, encargó una creación sonora esclusiva al músicu uviedín Fernando Largo. El que fuera miembru del grupu Beleño púnxose a la xera y compunxo un total de diez pieces inspiraes nel paisaxe, la cultura y la mitoloxía asturianes. Largo encargóse, amás de la composición, de tocar l’arpa, los teclaos y preparar les programaciones; xunto a él tuvieron presentes na grabación un ensame d’intérpretes bien conocíos nel folk y na música del país: Marcos Llope (flauta), Elías García (buzuqui), José Ángel Hevia (gaita), Javier Rojo (violín), Abel Martínez (guitarra eléctrica) y Rubén G. Tuero (pianu). El tonu de les pieces yera, nun podía ser d’otra manera, eminentemente ambiental, pero les aportaciones tímbriques de los instrumentos acústicos endolcábenles d’un calter llariegu, cercanu y caldiu, lloñe de la frialdá qu’esti tipu de composiciones -pensaes pa sonar de fondu– suelen tener.
La música del Pabellón d’Asturies naquel eventu mundial asoleyóse nuna casete titulada Asturias’92, de la que se publicaron unes poques copies que nun tuvieron distribución comercial. Nella podemos apreciar y disfrutar d’estes diez pieces enmarcaes ente l’ambient, la new age y el folk; mui na onda de lo que daquella taben faciendo bandes y solistes irlandeses o escoceses como Relativity, Clannad (que naquel añu 1992 publicaben el so álbum Banba, ún de los nome antiguos d’Irlanda), Nightnoise (esi añu poníen en circulación un recopilatoriu de nome A Windham Hill Retrospective), Capercaillie (nesi mesmu añu presentaben l’álbum Get Out, un recopilatoriu con remezcles y grabaciones en directo onde tamién s’introducíen nesti tipu de sonoridaes) o Enya (en 1992 reeditaría’l so primer trabayu discográficu, The Celts, un encargu de la BBC pa una serie de televisión del mesmu títulu). Otra manera, compositores como’l suízu Thierry Fervant con un álbum conceptual como Légends of Avalon (1988) o’l canadiense Bill Douglas col discu Cantinela (1990) tamién aportaríen y influyiríen nesta escena del celtic ambient.
Les composiciones creaes por Fernando Largo inxerábense dafechu nesta tendencia qu’ente finales de los 80 y mediaos de los 90 diose nel panorama sonoru celta; el compositor asturianu, col so talentu y calidá, poníase al altor del panorama internacional y con él la nuestra música.
// Calca equí pa sentir la primer la cita Asturias ’92 //
