«L’oxetivu de ‘Restolando’ ye que la xente pierda’l mieu a facer música con cualquier cosa que tenga a mano»

David Varela ye ún de los músicos más reconocíos y dinámicos del país. Esti multiinstrumentista lleva cuatro décades venceyáu a la música tradicional y pasó per milenta formaciones. Anguaño, amás de tar n’activo nel grupu bal-folk La Bonturné, na bandina Xe de Jota y de collaborar con Alicia Álvarez y Baxel y coles compañíes de teatru d’Ana Morán y Olga Cuervo; ta dando conciertos per toa Asturies col espectáculu ‘Restolando’, que’l próximu vienres 25 de febreru aporta al Espaciu escénicu de la Factoría Cultural d’Avilés y el sábadu 26 a les 19h al Teatru Vital Aza de La Pola (L.lena).

«Partiendo d’esta filosofía de rebuscar y revolver, ‘Restolando’ ye amosar dellos instrumentos que tengo y que guarden rellación cola cultura tradicional de les families y los pueblos asturianos», comenta Varela sobre esti show. D’esta manera, parte de «daqué que pasaba en cualquier eventu que reunía a la xente alrodiu la mesa» y pon d’exemplu lo que vivió na so familia, na que se facía música «con cuyares, platos, el quezu, les llates, la escoba, el banu, el morteru, un serruchu…», amás de col acordión, gaita, xiblates, guitarra, vigulín, panderos, panderetes, castañueles…. Too esto entra en «ocho maletos» que ye lo que Varela carga en coche cada vez que representa Restolando, apoyándose amás de «dellos aparatinos ellectrónicos que faciliten el fechu de tar solu nel escenariu y dan cierto sofitu contemporáneu al usu de tou esti trasteríu».

El músicu xixonés fai una valoración positiva de «la bona acoyida y la demanda que ta teniendo» dientro del circuitu Asturies Cultura en Rede. Con un públicu «mayormente infantil que s’asombra cuando ve so l’escenariu tanta bayura d’instrumentos», ‘Restolando’ tien otra clave: «qu’una sola persona tenga la habilidá de facelo sonar too». Nesti sen, Varela reconoz que «l’oxetivu d’esti conciertu ye que la xente pierda esi mieu a facer música con cualquier cosa que tenga a mano». un fin didácticu col qu’esti veteranu multiinstrumentista da un pasu más nel so llabor de divulgación y enseñu de la música tradicional asturiana.

Llanzamientos en solitario y con La Bonturné

Ente les clases, ‘Restolando’, el taller d’instrumentos con material recicláu, collaborar davezu col programa de la RPA ‘La Radio Es Mía’ y tocar nes formaciones enantes mentaes, David Varela anda siempre «enguedeyáu». Sicasí, reconoz que tolos díes se-y ocurre dalguna cosa nueva y desvela que ta preparando material en solitario: «los instrumentos de percusión qu’apaecen en ‘Restolando’, son colos que toi acompañándome na grabación de dellos temes que toi mezclando con acordión diatónicu. Son temes principalmente basaos n’arreglos tradicionales qu’espero pronto que sintáis nes plataformes dixtiales».

El músicu fala de la primavera o branu como feches pa la publicación de les que van ser les sos primeres referencies en solitario y añade que «coincidirá en tiempu y forma col llanzamientu de varios sencillos de La Bonturné». Asina ye como esti 2022, el grupu nel que Varela canta y toca l’acordión diatónicu xunto con Santi Caleya (saxu y gaita), Merce Santos (zanfona) y David Casillas (contrabaxu), va asoleyar el material grabáu pol que tanta xente ta naguando.

Mercar discos folk na tienda online