El gaiteru Tever llanza un crowdfunding pa crear la primer lutería 3D

Crear la primer lutería 3D d’Asturies en Teberga. Esi ye l’oxetivu de Chalga, el proyectu del gaiteru y informáticu Tever Díaz pa convertir el conceyu nun epicentru innovador de la música tradicional asturiana con un taller musical pioneru dedicáu a la creación d’instrumentos de la cultura asturiana con tecnoloxía d’impresión 3D, asina como a la formación musical, la investigación y el desarrollu de proyectos creativos.

Para facer realidá Chalga, que cunta col sofitu del Ayuntamientu de Teberga a traviés de la cesión d’un espaciu municipal na llocalidá d’Entragu, el tamién profesor de música de les Escueles de Música de Proaza y Teverga llanzó una campaña de micromecenazgu na plataforma Verkami pa financiar la compra d’un mínimu de dos impresores 3D profesionales. Ye’l primer pasu pa la puesta en marcha d’un taller pioneru que quier contribuyir a la llucha contra la despoblación en Teberga gracies al estímulu cultural y la innovación a partir de la tradición.

La campaña va durar hasta’l 30 de marzu; y cunta con delles formas d’apoyu y de recompenses pa los mecenes, dende flautas impreses en 3D, manuales de gaita y exemplares físicos del EP inéditu Suañu de gaita a oxetos de merchandising como camisetes, imanes y bolses d’algodón personalizaes. Hasta’l momentu yá lleva’l 43% de los 2.100 euros necesarios pa llevar alantre’l proyectu.

Un espaciu de creación y investigación abiertu

Chalga garra’l so nome de les “chalgas”, pallabra asturiana que faen referencia a les ayalgues escondíes que, según la cultura popular, dexaron enterraos en dellos llugares d’Asturies, como la Peña Sobia de Teberga, la xente musulmán qu’habitó n’Asturies..

“En Teberga, a les persones que busquen estes ayalgues llámase-yos chalgueiros. Los mayestros de música tradicional tamién somos buscadores d’ayalgues, chalgueiros de la educación musical coles nueves tecnoloxíes como pala pa cavar”, deplica Tever Díaz. 

Col enfotu n’atopar nueves ayalgues musicals, Chalga quier ser la primer lutería 3D d’Asturies, pero tamién un espaciu de formación, creación y investigación abiertu a tolos profesionales, lutieres y músicos interesaos na música tradicional. “La meyor receta pa combatir el duru diagnósticu de l’Asturies vaciada ye enllenar los nuestros pueblos de proyectos innovadores que creen valor, texen redes y atraigan a la xente. Si ye a traviés de los nuestros raigaños, el futuru ye nuestru”, añade Díaz.

Un gaiteru tecnolóxicu

Tever Díaz (Uviéu, 1984) ye gaiteru, profesor de música y inxenieru informáticu con raigaños familiares en Teberga, onde desendolca dende va más d’una década parte del so llabor musical. Miembrude la Banda Gaites Camín del Fierro y collaborador del programa La Buena Tarde de RTPA, onde tien una estaya dedicada a la música, dende 2015 ye profesor de gaita nes Escueles de Música de Proaza y Teberga. Na so llabor docente usa tecnoloxía como métodu d’enseñanza de la música tradicional, introduciendo novedaes como la impresión 3D de flautes de dixitazión. A traviés de la so canal de YouTube, dende 2020 crea conteníos divulgativos de baldre sobre gaita y música celta pa facer que la so pasión pola cultura musical tradicional y el folclore asturiano aporte a les nueves xeneraciones. Autor de dellos manuales sobre gaita, como artista publicó los senciellos Fayendo, Saltongaetton, Gaita Hero y Fervienza. En 2022, va llanzar el so primer EP, entituláu Suañu de gaita

Mercar discos folk de gaita tienda online

Dexa un comentariu

X