La música n’asturianu vive un momentu d’especial dinamismu, non solo enriba de los escenarios o nes plataformes de reproducción, sinón tamién nos espacios d’análisis, divulgación y conversación. Los podcasts son angüaño un canal clave pa reflexar esti ecosistema creativu, dando contestu a les propuestes musicales y poniendo nome y voz a artistes que construyen identidá sonora dende Asturies. Programes como Héroes ensin nome, A fueu celta y Nun me chisques, tres podcasts fechos por xente mozo, amuesen tres maneres distintes, pero complementaries, d’afondar nuna escena que sigue medrando adulces.
El pasáu 12 de xineru, Héroes ensin nome arrancó una nueva temporada consolidándose como unu de los espacios más reconocibles dedicaos a la cultura que se vien faciendo n’Asturies. D’esta manera, nes dos temporaes pasaes, pasaron pelos sos micros grupos como Misiva, Desakato, L-R o Xune Elipe, vocalista de Dixebra y collaborador d’esti mediu. Vuelve agora col so sellu habitual: episodios cuidaos, narración pausada y un interés especial por rescatar trayectories que non siempres ocuparon el primer planu mediáticu. El primer capítulu dedicáronlu a la memoria hestórica col director de cine Pablo Casanueva y mientres les 12 entregues d’esta temporada nueva, la presencia de la música fecha n’asturianu ta asegurada.
El podcast d’Asturxules, Nun me chisques, ye la principal novedá radiófonica d’entamos d’añu, con una apuesta innovadora fecha un tonu cercanu, conversacional y pegáu a l’actualidá. Nun me chisques destaca pola so capacidá pa xenerar diálogu. Entrevistes, comentarios y reflexones flúin con naturalidá, ensin perder de vista la importancia de la llingua y la cultura asturiana como marcu común. Ye precisamente ehí onde encaxa la música asturiana, qu’apaez yá dende la cabecera col cantar ‘Saldiguera’, de Llevólu’l Sumiciu. Anque entá nun pasaron artistes pelos sos micros, sí lo fixeron yá dende’l primer capítulu los promotores culturales Diego Castañón, de HHopCast y Marta Silverio, d’Emerxentes
Completa esti mapa sonoru A fueu celta, un podcast que pon el focu tamién na creación cultural d’Asturies y que dirixe l’estudiante de Perodismu Martín Peña. El programa destaca pola so estructura variada y pola participación d’un equipu de colaboradores que traten cuestiones culturales, sociales y d’hestoria popular dende una perspectiva informal. A fueu celta aporta una visión más coral y lúdica, amosando que los podcasts n’asturianu tamién pueden apostar pola mestura de xéneros y formatos, ensin perder identidá nin compromisu col idioma. Asina, pasaron pel podcast xente como Los Berrones, Ochobre o Ferla Megía, ente otros.
Tamién nos podcasts de los medios de comunicación ta presente la música n’asturianu. Unu de los proyectos que tamién suma voz al paisaxe musical ye N’ayuri, una serie d’entrevistes promovida por El Comercio nel so formatu de podcast. Dirixíu pol escritor y figura destacada del asturianismu Pablo Antón Marín Estrada, N’ayuri propón charres relaxaes y fondes con creadores y protagonistes de la cultura asturiana que compartan la so trayectoria creativa y el so compromisu col asturianu. Nel programa, convidaos d’aires variaos —músicos, escritores, artistes y axentes culturales— repasen la so obra y reflexonen sobre la cultura fecha n’Asturies.
Suscríbite a les nuestres novedaes
