La música participa na manifestación pola oficialidá coles actuaciones de Rodrigo Cuevas y Fruela 757 y el cantar “Llegó la hora / Chegou el hora”

Esti sábadu 16 d’ochobre, a les 12.00 hores, va salir de la Estación del Norte d’Uviéu una manifestación pola oficialidá que ta llamada a ser masiva y que va acabar na Plaza de la Catedral. Ellí, l’actriz María Cotiello y el presentador del tiempu de TPA David Arango van encargase de lleer el manifiestu final, mentes que’l DJ Fruela 757 y el cantante Rodrigo Cuevas van encargase de poner el ramu a la xornada reivindicativa con un miniconciertu.

La escena sonora asturiana nunca quedó de brazos cruciaos nel so compromisu cola llingua d’esta tierra. Dende hai décades, la música vien siendo un preséu fundamental nel procesu de normalización de la llingua asturiana y los cantantes y músicos asturianos usaron la so voz y soníos pa reivindicar la oficialidá, yá fora al traviés de la so participación nel Conciertu pola Oficialidá o faciendo cantares a costafecha pa concienciar sobre la importancia de que l’asturianu algamara l’estatus xurídicu d’oficialidá.

Agora, a pocos díes d’una manifestación pola oficialidá que pue ser la última, los artistes asturianos vuelven dar un pasu más ayudando a promocionar la convocatoria, dando cuenta de la so importancia histórica y llamando a la sociedá asturiana a sumase a la mesma. Y too esto al traviés del cantar ‘Llegó la hora‘.

El tema ye una idea orixinal de Xune Elipe con composición musical de Maxi Compán, con producción musical y técnicu de soníu de Sergio Díaz. La lletra ye de Francisco Álvarez con versión en gallego-asturianu de Xosé M. Suárez. El tema ta interpretáu por MÚSICOS POLA OFICIALIDÁ, que nesta ocasión ta formáu por Maxi Compán (voz y guitarres), Isra Sánchez (batería), Luis Melero (baxu), Sergio Díaz (baxu y guitarres), Rubén Bada (guitarra), Javi Tejedor (gaita, acordión, tambor y pandereta), Xune Elipe (voz), Lluci Palomares (voz), Pablo Martínez (voz), Silvia Quesada (voz), Leticia Baselgas (voz y pandereta), y Shalom (voz rapiao). El videoclip ye obra del realizador Pablo Quiroga.

Mira’l videuclip de “Llegó la hora / Chegou el hora”

Mercar na tienda online discos de Músicos Pola Oficialidá